ალბათ დაჰკვირვებიხარ, რომ როცა მნიშვნელოვან ზარს ელოდები ან სტრესულ სიტუაციაში ხარ, ერთ ადგილას ჯდომა ფიზიკურად არ გამოგდის. ოთახში წინ და უკან სიარულს იწყებ, ტელეფონით ლაპარაკისას შეიძლება თავბრუ დაახვიო თანამშრომელს ან ფეხი ათამაშო ნერვიულად და უწყვეტად.

გარედან ეს ამბავი ქაოსურ და უაზრო ქცევას ჰგავს; არადა, ამ დროს შენი სხეული ზუსტად იმას აკეთებს, რისთვისაც ბევრი წლის განმავლობაში ევოლუცია ამზადებდა — გადარჩენას ცდილობს.

საქმე ისაა, რომ ჩვენი ტვინი ჯერ ისე ვერ ასხვავებს რეალურ, ფიზიკურ საფრთხეს თანამედროვე სტრესისგან. დიდად არ აქვს მნიშვნელობა, შენკენ გაავებული ნადირი მოიწევს თუ სამსახურში დაუმსახურებელი შენიშვნა მიიღე, ორივე შემთხვევას ნერვული სისტემა საფრთხედ აღიქვამს.

ფოტო: Pinterest

როგორც კი ეს სიგნალი ირთვება, თირკმელზედა ჯირკვლები სისხლში მომენტალურად უშვებს სტრესის ჰორმონებს — ადრენალინს და კორტიზოლს. შესაბამისად, გული უფრო სწრაფად ფეთქავს, სისხლის მიმოქცევაც ჩქარდება და ორგანიზმიც საბრძოლო რეჟიმში გადადის.

ძველად, როცა ადამიანი, მაგალითად, დათვს გადაეყრებოდა ხოლმე, ზემოხსენებული ჰორმონების დახმარებით (გამო) ან გარბოდა, ან ბრძოლისთვის ემზადებოდა. ორივე შემთხვევაში, იმ ზედმეტ ენერგიას, რომელიც მიიღო, ფიზიკურად ხარჯავდა.

დღეს, როცა ჩვენი ცხოვრების წესი და საჭიროებები შეიცვალა, სტრესორებმაც ფორმა იცვალა. თუ, მაგალითად, საქმის შესრულებას დათქმულ დროში ვერ ასწრებ, არსად გაქცევა და არავისთან ბრძოლა არ გჭირდება. ზიხარ სამუშაო მაგიდასთან, საშუალოდ კომფორტულ სავარძელში და შენს სხეულში (განსაკუთრებით კუნთებში) გამომწყვდეულ ზედმეტ ადრენალინს და ენერგიას დახარჯვის საშუალებას არ აძლევ.

ჰოდა, ოთახში წინ და უკან სიარული, ფეხის უწყვეტი თამაშიც და თითების ტკაცუნი სხვა არაფერია, თუ არა ამ მოზღვავებული ენერგიისგან გათავისუფლების მცდელობა. შენი ორგანიზმი, შენი გაცნობიერებული ნების მიუხედავად, ცდილობს მცირე მოძრაობებით მაინც დახარჯოს ზედმეტი ადრენალინი.

ამიტომ, როცა ნერვიულობისას სიარულს იწყებ, ნუ შეეცდები სხეულის კონტროლს, სავარძელზე მის ძალით დასმას, პირიქით — დაუჯერე და უსმინე. როგორც კი კუნთებში ეს ხელოვნურად გამომუშავებული ენერგია დაიხარჯება, ტვინი მიხვდება, რომ „გაქცევა“ წარმატებით დასრულდა და შფოთვა ბუნებრივად გაქრება.