საქართველოს პარლამენტი არ არის მიწვეული გაფართოების საკითხებზე საპარლამენტთაშორისო კომიტეტის სხდომაზე, რომელიც 2026 წლის 24 ივნისს ევროპარლამენტში გაიმართება. ირაკლი კობახიძეს ტვ პირველის ჟურნალისტმა ამ საკითხზე დაუსვა კითხვა. მისი თქმით PACE-ის წერილში განმარტებული, რომ საქართველო მოწვეული არ არის სხდომაზე იმიტომ, რომ ისინი არ აღიარებენ საქართველოს ხელისუფლებას.

"არაღაირების გამო საქართველო ვერ მოხვდება იმ წრეში, სადაც განიხილავენ ევროკავშირის გაფართოებას?" — ჰკითხა ჟურნალისტმა კობახიძეს, რაზედაც მისი პასუხი იყო, რომ "როდესაც ხალხის მიერ არჩეულ ხელისუფლებას არ აღიარებ, ეს ნიშნავს, ბუნებრივია, თავდასხმას ქვეყნის სუვერენიტეტზე" და მათი "ამოცანაა, რომ ყველამ აღიაროს საქართველოს სუვერენიტეტი და ტერიტორიული მთლიანობა, როგორც რუსეთის დუმამ, ისე ევროპარლამენტმა".

"სხვადასხვა მიმართულებით ვაწარმოებთ პოლიტიკას არაღიარების წინააღმდეგ და ევროპარლამენტის წინააღმდეგაც მზად ვართ, რომ ასეთი პოლიტიკა ვაწარმოოთ, ხო? თქვენ იცით, რომ მაგალითად, რუსეთის ფედერაცია და კიდევ ოთხი სახელმწიფო არ აღიარებს საქართველოს სუვერენიტეტს აფხაზეთის და ცხინვალის რეგიონის მიმართ, ანალოგიურად ევროპარლამენტი არ აღიარებს საქართველოს სუვერენიტეტს საქართველოს მთელ ტერიტორიაზე და ეს მათი საქმეა, ხო?

როდესაც ხალხის მიერ არჩეულ ხელისუფლებას არ აღიარებ, ეს ნიშნავს, ბუნებრივია, თავდასხმას ქვეყნის სუვერენიტეტზე. რა თქმა უნდა, ეს ასეა.

ჩვენი ამოცანაა, რომ ყველამ აღიაროს საქართველოს სუვერენიტეტი და ტერიტორიული მთლიანობა, როგორც რუსეთის დუმამ, ისე ევროპარლამენტმა. ჩვენი ამოცანა ეს არის და ამაზე ვიმუშავებთ.

მე მგონი ძალიან დაუახლოვდნენ. უფრო მეტიც, საბჭოთა კავშირის უზენაეს საბჭოს ძალიან ჰგავს ევროპარლამენტი დღევანდელი მდგომარეობით, დღევანდელი სულისკვეთებით, იმ საბჭოური მიდგომებით, რომლითაც ისინი მუშაობენ. ეს არის ტრაგიკული მდგომარეობა. ყველა ხედავს ამას, რამდენად ტრაგიკულ მდგომარეობაშია დღეს ევროპარლამენტი", — განაცხადა ირაკლი კობახიძემ.