ლიეტუვის პრემიერმინისტრმა ინგა რუგინიენემ თანამდებობა დატოვა, რის შედეგადაც სოციალ-დემოკრატების ხელმძღვანელობით მოქმედი მთავრობა საქმიანობას ასრულებს და ქვეყანაში ახალი კაბინეტის ფორმირების პროცესი იწყება. ამის შესახებ ინფორმაციას გამოცემა LRT ავრცელებს.

ლიეტუვის მე-20 მთავრობის ბოლო სხდომა სამშაბათს გაიმართა, სადაც მინისტრებმა მთავრობის გადადგომის შესახებ რეზოლუცია ერთხმად დაამტკიცეს.

"მიუხედავად ყველა სირთულისა, ბევრი რამ გვაქვს, რითიც შეგვიძლია ვიამაყოთ და თითოეულმა თქვენგანმა მნიშვნელოვანი წვლილი შეიტანა ჩვენი სახელმწიფოს კეთილდღეობასა და ხალხის ცხოვრების გაუმჯობესებაში. დღეს ვიღებთ გადაწყვეტილებას გადადგომის შესახებ და მთავრობის უფლებამოსილებას რესპუბლიკის პრეზიდენტს ვუბრუნებთ", — განუცხადა რუგინიენემ მინისტრთა კაბინეტის წევრებს.

სხდომის დასრულების შემდეგ ჟურნალისტებთან საუბრისას მან საკუთარი საქმიანობა შეაფასა და აღნიშნა, რომ პრემიერმინისტრობის პერიოდში მნიშვნელოვანი გამოცდილება მიიღო.

"პოლიტიკაში ბევრი რამის სწავლა შეიძლება — როგორ გამოიყურებოდე კარგად, როგორ ისაუბრო გამართულად, მაგრამ ვერ ისწავლი გამბედაობასა და ადამიანურობას. ემპათია, ადამიანების მოსმენის უნარი და მოქმედების გამბედაობა სწორედ ის თვისებებია, რომლებიც რთული გადაწყვეტილებებისა და პასუხისმგებლობების მიუხედავად, სწორ გზაზე დარჩენაში მეხმარებოდა", — განაცხადა რუგინიენემ.

მისივე თქმით, საზოგადოების ნაწილისთვის შესაძლოა უჩვეულო იყო, რომ ის არ შეესაბამებოდა "პრემიერმინისტრის ტრადიციულ სტერეოტიპულ იმიჯს".

"არასოდეს მჯეროდა, რომ ლიდერი სხვის მიერ წინასწარ შექმნილ შაბლონებს უნდა ერგებოდეს", — აღნიშნა მან.

რუგინიენემ უარყო მოსაზრება, თითქოს თანამდებობის დატოვება მისი პარტიის მხრიდან პოლიტიკური მსხვერპლშეწირვა ყოფილიყო და განაცხადა, რომ მიმდინარე ცვლილებები ჩვეულებრივი პოლიტიკური პროცესის ნაწილია.

მისი თქმით, სოციალ-დემოკრატიული პარტიის ლიდერი მინდაუგას სინკევიჩიუსი პრემიერმინისტრის პოსტი ჯერ კიდევ გასულ წელს უნდა დაეკავებინა, როდესაც მისი წინამორბედი გინტაუტას პალუცკასი გადადგა, თუმცა ეს პროცესი გადაიდო.

"რაც ახლა ხდება, გასულ წელს უნდა მომხდარიყო. დღეს მივდივარ თავაწეული და მშვიდი გულით", — განაცხადა რუგინიენემ.

გადადგომის შესახებ დადგენილება სამშაბათს პრეზიდენტ გიტანას ნაუსედას გადაეგზავნება. მან მოქმედ მთავრობას სთხოვა, ახალი კაბინეტის ფორმირებამდე მოვალეობის შემსრულებლის სტატუსით გააგრძელოს საქმიანობა.

კოალიციური შეთანხმების თანახმად, პრემიერმინისტრობის კანდიდატად მინდაუგას სინკევიჩიუსია დასახელებული. ახალი საპარლამენტო უმრავლესობა სოციალ-დემოკრატების, "დემოკრატთა კავშირის — ლიეტუვისთვის" და ლიეტუვის ფერმერთა, მწვანეთა და ქრისტიანული ოჯახების კავშირისგან შედგება და სეიმში 75 მანდატს ფლობს.

ახალი კოალიციის ფარგლებში მინიმუმ ოთხ მინისტრს შეიცვლიან. დემოკრატები სოფლის მეურნეობის, ენერგეტიკისა და ჯანდაცვის სამინისტროებს ჩაიბარებენ, ხოლო გარემოს დაცვის სამინისტრო სოციალ-დემოკრატებს გადაეცემა. რუგინიენე, სავარაუდოდ, სოციალური დაცვისა და შრომის მინისტრის თანამდებობას დაუბრუნდება.

ეს მიმდინარე საპარლამენტო მოწვევის პერიოდში ლიეტუვაში მთავრობის ცვლილების უკვე მეორე შემთხვევაა. პირველი ცვლილება გასულ წელს მოხდა, როდესაც პრემიერმინისტრი გინტაუტას პალუცკასი მის ბიზნესსაქმიანობასა და კავშირებთან დაკავშირებული გამოძიებების ფონზე გადადგა, რასაც მთავრობის სრული გადადგომაც მოჰყვა.