ქუთათელ-გაენათელი მიტროპოლიტი იოანე ნამახვანჰესის მოწინააღმდეგე აქტივისტებს სუბიექტურებს უწოდებს.

"ამ შემთხვევაში უფრო სწორი იქნება გზა დიალოგის ხელისუფლებასთან. პეტიცია შეიტანა პარლამენტში ვარლამმა, იყო განხილვა, კომისიამ განიხილა და უთხრეს, რომ ამას გადავცემთ სპეციალისტებსო და სამინისტროებს შესაბამისად.

სუბიექტურები არიან, მიკერძოებულები არიან. თავიდან კატასტროფაზე ლაპარაკობდნენ, მაგრამ რეალურად დღეს ლაპარაკია იმ ხელშეკრულებაზე, რომელიც სავარაუდოდ, ჩემი აზრი არის, გადახედვას მოითხოვს", — თქვა ბაგრატის ტაძრის ეზოში მეუფე იოანემ.

დღეს ნამახვანჰესის მშენებლობის მოწინააღმდეგეებმა სოფელ სორმონთან ახალი კარავი გაშალეს. აქციის ორგანიზატორები ვარაუდობენ, რომ კომპანია ნამახვანში ტექნიკის შეყვანას სწორედ ამ გზით შეეცდება.

გუმათჰესთან კი, ამ დრომდე პოლიციაა განლაგებული. სამართალდამცავები ადგილზე მას შემდეგ არიან, რაც სოფელ ნამოხვანში ხეობის აქტივისტებს კარვები დაუშალეს და იქ დაბრუნების საშუალებას არ აძლევენ. რკინის ბარიკადებში მხოლოდ ადგილობრივ მოსახლეობას ატარებენ, თუმცა აქციის მონაწილეებს სახლში წასასვლელად შემოვლითი გზის გამოყენება უწევთ. ბარიკადებს პოლიცია ამაგრებს, რომელთა რაოდენობაც საღამოობით იზრდება.

მას შემდეგ, 26 მაისს რაც ხეობის აქტივისტები თბილისში გამართული აქციებიდან გუმათში დაბრუნდნენ, ისინი ყოველ ღამე ბარიკადებზე აბრახუნებენ და ხმაურობენ.

27 მაისს შინაგან საქმეთა სამინისტრომ განაცხადა, რომ რკინის ბარიკადებზე ქვებს ურტყამდნენ, რის გამოც ისინი დაზიანდა და საქმეზე გამოძიება დაიწყეს. აქტვისიტები კი აღნიშნავენ, რომ ხმაური გაგრძელდება იქამდე, სანამ მოთხოვნები არ შესრულდება.