დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, კორონავირუსის გავრცელების პრევენციისთვის საჭირო რეკომენდაციების დაცვა განსაკუთრებით საკურორტო ადგილებში ტურისტების მიერ არ ხდება.

"ადგილობრივი მოსახლეობა უფრო იცავს რეკომენდაციებს, ვიდრე ტურისტები. ის 700 შემთხვევა რაც დღეს გვაქვს და 1 000 რაც გუშინ გვქონდა, მიუხედავად იმისა, რომ კლების ტენდენციაა საქართველოსთვის არის საკმაოდ ბევრი და ამან შეიძლება ყოველდღიურად იჩინოს თავი ისევ მატებაში", — განაცხადა გამყრელიძემ რუსთავი 2-თან.

30 მაისის მონაცემებით, საქართველოში კორონავირუსის 723 ახალი შემთხვევა დადასტურდა, გამოჯანმრთელდა 1 407, ხოლო გარდაიცვალა — 18 ადამიანი.

ბოლო 24 საათში ქვეყნის მასშტაბით ჩატარდა 25 300 კვლევა ტესტით, მათ შორის ანტიგენის სწრაფი ტესტით — 14 238, PCR-ით — 11 062.

Stopcov.ge-ზე გამოქვეყნებული ინფორმაციის თანახმად, დადებითობის დღიური მაჩვენებელი არის 2,86%, ბოლო 14 დღის განმავლობაში — 3,46%, ხოლო 7 დღის — 2,85%.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: