ლელო სისტემური კორუფციის შემსწავლელი საპარლამენტო კომისიის შექმნას ითხოვს. ამის შესახებ ფრაქციის თავმჯდომარემ, ბადრი ჯაფარიძემ პლენარულ სხდომაზე ისაუბრა. მან რამდენიმე ორგანიზაციის ანგარიშის მონაცემები მოიყვანა, სადაც საუბარია პანდემიის პერიოდში ქართული ოცნების შემომწირველებთან პირდაპირ შესყიდვებზე, ასევე, თანამდებობების პირებთან დაახლოებულ ადამიანებთან საეჭვო კონტრაქტებზე. ამასთან, ჯაფარიძემ თქვა, რომ ბოლო წლებში არცერთი დიდი კორუფციული საქმე არ გახსნილა და გამოიკვეთა ელიტური კორუფცია.

"ქვეყანაში არის ძალიან მძიმე მდგომარეობა კორუქციის გავრცელების კუთხით. გვაქვს ელიტური კორუფცია, ასევე, წვრილმანი კორუფციის უამრავი შემთხვევა, მაგრამ დაუსჯელობის სინდრომი არის მოდებული. ამიტომ, აუცილებლად მიგვაჩნია, შეიქმნას პარლამენტში სისტემური კორუფცის შემსწავლელი კომისია, რომელიც შეისწავლის ყველა ამ კონკრეტულ ფაქტს, ყველა ამ კონკრეტულ ციფრს, სტატისტიკას და დაადგენს, რასთან გვაქვს საქმე", — თქვა ჯაფარიძემ.

ბადრი ჯაფარიძის ინფორმაციით, ლელო ანტიკორუფციული სააგენტოს შექმნის მიზნით კანონის ინიცირებას აპირებს. აღსანიშნავია, რომ ასეთი უწყება უკვე არსებობს, თუმცა სუს-ს ექვემდებარება.