ქართული ოცნების დეპუტატის, შალვა პაპუაშვილის თქმით, გენდერულ კვოტასთან დაკავშირებით არსებული საკანონმდებლო ხარვეზი შესაძლოა შეიცვალოს. როგორც მან დღეს პარლამენტის პლენარულ სხდომაზე განაცხადა, არის წინადადება, რომლის თანახმად, თუ სიის ჩახსნის შემთხვევაში სხვა სქესის ადამიანი არ დარჩება, ის მანდატი გაუქმდეს.

"აქ იყო კითხვები და ბატონი იაგოს [ხვიჩია] გასაგონადაც ვიტყვი გენდერულ კვოტასთან დაკავშირებით. როგორც აღმოჩნდა, იყო საკანონმდებლო ხარვეზი, რომელმაც მისცა შესაძლებლობა, ამ შემთხვევაში გირჩს, რომ გვერდი აევლო გენდერული კვოტისთვის და ხომ არ შეიძლება, რომ ეს ხარვეზი ამოივსოს. არის წინადადება, იმ შემთხვევაში, თუ ჩაიხსნება სია იმგვარად, რომ აღარ დარჩება სხვა სქესის ადამიანი სიაში, ის მანდატი გაუქმდეს", — განაცხადა პაპუშვილმა.

ის, ასევე, ამ კუთხით საკანონმდებლო ორგანოში არსებულ სხვა ხარვეზზე საუბრობს.

"მეორე ხარვეზი არსებობს ამ პარლამენტში, რომელიც ორ პარტიას ეხება. ერთი აქ არის და მეორე ჯერ არ შემოსულა. როდესაც ერთი პარტიიდან მხოლოდ ერთი სქესის წევრები არიან, მაგალითად, [პარტია] მოქალაქეების შემთხვევაში და ჩვენი არსებული რეგულაციებით, თუკი ერთი სქესის წარმომადგენლები არიან შემოსული, ვთქვათ, მოქალაქეების შემთხვევაში და ერთ-ერთი გავა, იცით რომ იმავე სქესმა უნდა ჩაანაცვლოს. შესაბამისად, მოქალაქეების შემთხვევაში მათი ქალი წევრები ვერასდროს ვერ გახდებიან დეპუტატები, რამდენი დეპუტატიც არ უნდა შეიცვალოს. ესეც ხარვეზია გარკვეულწილად. ასე რომ, მეორე მოსმენაზე ამ საკითხზე უნდა ვიფიქროთ, ალბათ", — აღნიშნა პარლამენტის წევრმა.

დღეს პარლამენტის დეპუტატ სალომე მუჯირს დეპუტატის უფლებამოსილება ვადამდე ადრე შეუწყვიტა. მისი ადგილმონაცვლე ალექსანდრე რაქვიაშვილი იქნება.

ქართული ოცნების დეპუტატმა, ნინო წილოსანმა ამის გამო გირჩი გააკრიტიკა. წილოსანმა პარტიის ერთ-ერთ ლიდერ იაგო ხვიჩიას მიმართა და აღნიშნა, რომ გირჩმა ერთადერთ დეპუტატ ქალს მანდატზე უარი "ათქმევინა".

იაგო ხვიჩიამ კი უპასუხა,რომ ამით პარტიამ ამომრჩევლების ნება შეასრულა და ამაში მეგობრები დაიხმარეს, რათა "იდიოტური" რეგულირებისთვის აევლოთ გვერდი.

სალომე მუჯირი პარლამენტში გირჩის პროპორციული სიით მოხვდა. გირჩი პარტიულ სიებში გენდერულ კვოტირებას არ ეთანხმება და აცხადებდა, რომ სიაში ქალებს მხოლოდ ფორმალურად ჩასვამდა.