პარლამენტის ადამიანის უფლებათა კომიტეტის თავმჯდომარე, მიხეილ სარჯველაძე აცხადებს, რომ ნინოწმინდის პანსიონში შექმნილი ვითარება დაუყოვნებლივ უნდა შეიცვალოს და ინფორმაციის დახურვა საზიანოა. ამის შესახებ მან პარლამენტში სიტყვით გამოსვლისას განაცხადა.

"ეს ვითარება ვერ გაგრძელდება, ეს ვითარება უნდა შეიცვალოს და საამისოდ ვართ მზად რომ ყველაფერი გაკეთდეს. შესაბამისად, ჩემი თხოვნაა ყველას მიმართ, ინფორმაციის დახურვა, ჩაკეტვა არის ყოველმხრივ საზიანო პირველ რიგში ამ ბავშვთა სახლისთვის. შესაბამისად, ვიზრუნოთ ყველამ, რომ ეს მდგომარეობა რეალურად აღმოიფხვრას და ნორმალურ კალაპოტში ჩადგეს მოვლენები", — თქვა დეპუტატმა.

სარჯველაძის განცხადებით, "შექმნილია ვითარება, რომელიც ასე ვერ გაგრძელდება". მან ყველას მიმართა თხოვნით, ნუ ეცდებიან, რომელიმე მხარე წარმოაჩინონ შავ ფერში და რომელიმე — თეთრ ფერში.

"ძალიან მნიშვნელოვანია, რომ უკლებლივ ყველას ჩართულობით და მე მინდა საამისოდ მზადყოფნა გამოვხატო და საჯაროდ ვაფიქსირებ, რომ ვითარება მოითხოვს უსწრაფესად, დაუყოვნებლივ შეცვლას, სწორ, ნორმალურ კალაპოტში ჩაყენებას. საამისოდ ყველა დაინტერესებული მხარის ძალისხმევა იქნება ძალზედ მნიშვნელოვანი", — თქვა ადამიანის უფლებათა კომიტეტის თავმჯდომარემ.

რა ხდება ნინოწმინდის ბავშვთა პანსიონში

სახალხო დამცველი წლებია აღნიშნავს, რომ ნინოწმინდის წმინდა ნინოს ბავშვთა პანსიონში განხორციელებულმა მონიტორინგებმა ბავშვთა მიმართ ძალადობის მწვავე ფაქტები და ბავშვების დასჯის შემთხვევები გამოკვეთა. პანსიონში მცხოვრები არასრულწლოვნები, ფაქტობრივად, იზოლირებულები არიან სოციუმიდან და პრობლემურია მათი ინდივიდუალური საჭიროებების დაკმაყოფილების საკითხი.

15 აპრილს სახალხო დამცველის წარმომადგენელი საპატრიარქოს ნინოწმინდის წმინდა ნინოს ობოლ, უპატრონო და მზრუნველობამოკლებულ ბავშვთა პანსიონში არ შეუშვეს. ომბუდსმენის აპარატში აცხადებენ, რომ ამის მიზეზად, დაწესებულების წარმომადგენელმა სხალთის მთავარეპისკოპოსის, მეუფე სპირიდონის მითითება დაასახელა. განმარტება გააკეთა თავად სპირიდონმაც და ჰომოფობიური მიზეზი დაასახელა — მისი თქმით, პანსიონში ომბუდსმენის წარმომადგენლებს იმიტომ არ უშვებს, რომ "ერთნაირსქესიანთა ქორწინების დაკანონებას ითხოვენ და ასეთებს თავის ბავშვებს საჯიჯგნად ვერ მისცემს".

ამის შემდეგ ორგანიზაციამ პარტიონორობა ადამიანის უფლებებისთვის თბილისის საქალაქო სასამართლოს მიმართა და მთავრობისგან ნინოწმინდის პანსიონში ყველა შესაბამისი უწყების მიერ მონიტორინგის ჩატარების უზრუნველყოფა მოითხოვა. სასამართლოს ეს მოთხოვნა არ დააკმაყოფილა, თუმცა დააკმაყოფილა გაერომ და შესაბამისად, მთავრობა ვალდებულია, უზრუნველყოს მონიტორინგი.

რაც შეეხება სახელმწიფოს რეაქციას, 14 მაისს, პარლამენტში, ჯანდაცვის სამინისტროს სოციალური დაცვის პოლიტიკის სამმართველოს უფროსმა, დეპუტატ დავით სერგეენკოს კითხვის პასუხად თქვა, რომ ნინოწმინდის ბავშვთა პანსიონში ბოლო ერთი თვის განმავლობაში მეურვე-მზრუნველობის ორგანო მონიტორინგს სტანდარტულად ახორციელებს.

15 მაისს კი On.ge-ს სახელმწიფო ზრუნვის სააგენტოში უთხრეს, რომ ბავშვთა პანსიონში სოციალური მუშაკი უკვე სამი კვირის განმავლობაში ახორციელებს გეგმიურ ვიზიტებს და აქტიურად მიმდინარეობს ბავშვებთან პირისპირ შეხვედრები და ინტერვიუები.

სახალხო დამცველის აპარატის ინფორმაციით, მათი წარმომადგენლები 19 მაისს ისევ იმყოფებოდნენ ნინოწმინდის ბავშვთა პანსიონში, თუმცა მონიტორინგის საშუალება კვლავ არ მიეცათ. როგორც ისინი ამბობენ, პანსიონის წარმომადგენლებმა მათთან საუბარი არ ისურვეს და მიზეზად ხელმძღვანელის მითითება დაასახელეს.

სახალხო დამცველის ცნობით, ამჟამად პანსიონში 57 არასრულწლოვანი ირიცხება, მათგან ყველაზე პატარა 5 წლისაა. ომბუდსმენი ამბობს, რომ დაწესებულებაში მონიტორინგის შესაძლებლობა არც სახელმწიფო ზრუნვის სააგენტოს სოციალურ მუშაკს ეძლევა, რომელსაც 2020 წლის ივნისის შემდეგ პანსიონში არ შესულა.

"სახალხო დამცველისადმი სააგენტოს მიერ მოწოდებულ ოფიციალურ კორესპონდენციაში აღნიშნულია, რომ მეუფე სპირიდონი პანსიონში სოციალური მუშაკის ვიზიტების წინააღმდეგია, რაც ადგილზე სოციალურმა მუშაკმაც დაადასტურა".

აღსანიშნავია, რომ ამ ყველაფრის პარალელურად, პანსიონში პრორუსული Alt-info შეუშვეს. Alt-info, რომელიც ცნობილია ჰომოფობიური, ქსენოფობიური, დისკრიმინაციული გზავნილებით და ძალადობრივ ჯგუფებთან კავშირით პანსიონს რამდენიმე კვირის წინ სტუმრობდა და სიუჯეტი გადაიღო. სიუჟეტი მიმართულია სახალხლო დამცველისა და მედიის დისკრედიტაციისკენ და მიზნად ისახავს ეკლესიის დადებითად წარმოჩენას.

ამავე თემაზე: