დაავადებათა კონტროლის ეროვნული ცენტრის (NCDC) ხელმძღვანელის, ამირან გამყრელიძის განცხადებით, AstraZeneca-ს, დაახლოებით, 43 000 დოზა ქვეყანაში 15 ივნისამდე უნდა შემოვიდეს. მისივე თქმით, ივნისის ბოლოს ან ივლისის პირველ რიცხვებში Sinopharm-ის ნახევარ მილიონ დოზას ელოდებიან, შემდეგ კვარტალში კი — Pfizer-ის მილიონ დოზას.

"გარდა ამ 200 000-სა რაც ახლა არის ქვეყანაში, დაახლოებით, 43 000 დოზა Astra Zeneca უნდა შემოვიდეს 15 ივნისამდე ქვეყანაში კოვაქსის პლატფორმის საშუალებით. ასევე, დადასტურებულია, რომ ივნისის ბოლოს ან ივლისის პირველ რიცხვებში ნახევარი მილიონი Sinopharm-ი უნდა შემოვიდეს ქვეყანაში და შემდეგ მესამე კვარტალში უნდა შემოვიდეს მილიონი დოზა Pfizer-ი", — განაცხადა გამყრელიძემ.

მან, ასევე, აღნიშნა, რომ პარალელურად მიმდინარეობს მოლაპარაკებები სინოვაკთან და ნოვავაქსთან.

"1 400 000 დოზა ჩვენ უნდა მივიღონ კოვაქსის საშუალებით. დღემდე კოვაქსიდან მიღებული გვაქვს 115 000 დოზა და 43 000 უნდა დაემატოს კიდევ ივნისის შუა რიცხვებამდე", — ამბობს NCDC-ის ხელმძღვანელი.

საქართველოში Covid-19-ის საწინააღმდეგო აცრისთვის ოთხი ვაქცინა — AstraZeneca, Pfizer-ი, Sinopharm-ი და Sinovac-ი გამოიყენება. ქვეყანაში ვაქცინაცია AstraZeneca-ს ვაქცინით 15 მარტიდან დაიწყო.

გაიგეთ მეტი ვაქცინაციის მნიშვნელობაზე: