ევროკავშირის წევრი ქვეყნების ლიდერებმა 24 მაისს საგანგებო სხდომაზე მინსკში საერთაშორისო თვითმფრინავის დაშვება და ჟურნალისტის დაკავება განიხილეს. ევროპულმა საბჭომ ევროკავშირში ბაზირებულ ყველა ავიაკომპანიას მოუწოდა, თავი შეიკავონ ბელარუსის საჰაერო სივრცის გამოყენებისგან.

გარდა ამისა, ის მოუწოდებს გატარდეს შესაბამისი ზომები, რათა ბელარუსის ავიაკომპანიებს ევროკავშირში შესვლის უფლება აღარ ჰქონდეთ, ასევე ევროკავშირის აეროპორტებში აღარ დაიშვას ასეთი კომპანიები.

ევროპულმა საბჭომ ჟურნალისტ რომან პროტასევიჩისა და მისი შეყვარებულის, სოფია საპეგის დაუყოვნებლივ გათავისუფლება მოითხოვა. ამასთან, ისინი მოუწოდებენ, რომ სამოქალაქო ავიაციის საერთაშორისო ორგანიზაციამ Ryanair-ის შემთხვევა გამოიძიოს.

23 მაისს ათენიდან ვილნიუსისკენ მიმავალი Ryanair-ის თვითმფრინავი მინსკის აეროპორტში საგანგებოდ დაეშვა. ეს მას შემდეგ მოხდა, რაც გავრცელდა ინფორმაცია, რომ ბორტზე ასაფეთქებელი. საბოლოოდ შეტყობინება ცრუ აღმოჩნდა. ბელარუსის თავზე კი თვითმფრინავს სამხედრო გამანადგურებელი MiG-29 დაყვებოდა.

მგზავრებს შორის ოპოზიციური ტელეგრამარხის Nexta-ს ხელმძღვანელი, რომან პროტასევიჩი, რომლის წინააღმდეგაც ბელარუსში სისხლის სამართლის საქმეა აღძრული და მასობრივი არეულობის ორგანიზებას ედავებიან. პროტასევიჩი და მისი შეყვარებული, რუსეთის მოქალაქე სოფია საპეგა აეროპორტში დააკავეს. შვიდსაათიანი დაკავების შემდეგ კი ლაინერი ვილნიუსში ჩავიდა.

ევროპული ქვეყნების დიდმა ნაწილმა თვითმფრინავის დაშვება სწორედ პროტასევიჩის დაკავებას დაუკავშირა. ლიეტუვამ თავის მოქალაქეებს მოუწოდა ბელარუსი დატოვო და განაცხადა, რომ ბელარუსის საჰაერო სივრციდან რეისების მიღებასა და გაგზავნას წყვეტს. ბელარუსთან საჰაერო მიმოსვლის შეწყვეტას გეგმავს უკრაინა.

დაკავებიდან თითქმის ერთი დღის თავზე ბელარუსის სახელმწიფო მედიებმა პროტასევიჩის ვიდეო გაავრცელეს, სადაც ის აცხადებდა, რომ აღიარებით ჩვენებას აძლევდა. ასევე, აცხადებდა, რომ თავს კარგად გრძნობდა და მინსკის იზოლატორში იმყოფებოდა.