ლელოს ერთ-ერთმა ლიდერმა, ანა ნაცვლიშვილმა ადამიანთა უფლებათა დაცვისა და სამოქალაქო ინტეგრაციის კომიტეტის სხდომაზე მიხეილ სარჯველაძეს მიმართა და უთხრა, რომ ქალი გამომსვლელების დროს კომიტეტის წევრებს ეღიმებათ, ეს კი ძალიან უხერხულია.

"ძალიან მინდა გთხოვოთ, ამჯერად ბატონ მიხეილს, ერთი სამწუხარო ტენდენცია აღმოვაჩინე მას შემდეგ, რაც პარლამენტში ვარ და ამას ეთიკის საბჭოსაც აუცილებლად გადავცემ, მაგრამ როგორც სხდომის თავმჯდომარეს, ახლა მოგმართავთ, რატომღაც ძალიან იქედნურად გეღიმებათ ხოლმე, როდესაც ქალები ვსაუბრობთ. ანა ბუჩუკურზე შევამჩნიე და შემდეგ მივხვდი, რომ მხოლოდ ჩემზე არ ეღიმებათ. ძალიან უხერხულია. ბატონო სოზარ, თქვენი მოქმედებაც ძალიან უხერხულია. სახალხო დამცველი ბრძანდებოდით და მინდა გითხრათ, რომ საკმაოდ კარგი და იმ დროინდელ სოზარ სუბარს დღესაც ვუდასტურებ პატივისცემას", — განაცხადა დეპუტატმა.

კომიტეტის თავმჯდომარემ ამ განცხადებას კომიკური უწოდა და ნაცვლიშვილს "შორს მიმავალი" ბრალდების გაჟღერებისგან თავის შეკავებისკენ მოუწოდა.

"ქალბატონო ანა, არ შეიძლება, რომ უპასუხოდ დავტოვო მიუხედავად იმისა, რომ არაფერს პრაქტიკულად თქვენს ნათქვამში არ ვეთანხმები, ამაზე უბრალოდ თავს შევიკავებ ყველაფერზე კომენტარებისგან, მაგრამ იმ ნაწილს, სადაც საუბარი შეეხო გაღიმებას და ა.შ. მე მგონი, რომ აქ ძალიან მწარედ ცდებით. ეს არ არის სწორი, არასდროს მსგავსი რამ არ გამიკეთებია, თავის გასამართლებლად არ გეუბნებით, უბრალოდ, მაგალითად, შეიძლება ყველაზე მეტად ღიმილი დამთამაშებდა, როდესაც ბატონი შალვას კომენტარებს ვისმენდი და ახლა რა გავაკეთოთ, გავზომოთ რამდენ ხანს ვიღიმოდი თითოეულ გამომსვლელზე? ეს იყო კომიკური განცხადება, ამას სხვას ვერაფერს დავარქმევდი და ასეთი რაღაცებისგან, გთხოვთ, რომ თავი შეიკავოთ, ვიდრე ბრალდებას განაცხადებთ ხოლმე აქ შორს მიმავალს", — თქვა სარჯველაძემ.