ქართული სტარტაპი Payze ამერიკული Y Combinator-ის აქსელერაციის პროგრამაში მოხვდა

ონლაინ გადახდების ქართული სტარტაპი Payze წამყვანი ამერიკული აქსელერატორის Y Combinator-ის აქსელერაციის პროგრამაში მოხვდა. აღსანიშნავია, რომ ის ჯერ-ჯერობით ერთადერთი ქართული კომპანიაა, რომელიც Y Combinator-ში გაივლის აქსელერაციას.

Y Combinator 2005 წლიდან ოპერირებს ამერიკის ბაზარზე და მისი დახმარებით 2000-ზე მეტი კომპანია გაეშვა.

დადგა ის დღეც, როცა ღიად შეგვიძლია გამოვაცხადოთ, რომ ფეიზი გახდა YCombinator-ის აქსელერაციის პროგრამის მონაწილე, რაც ძალიან დიდი და თავდაუზოგავი შრომის ნაყოფია. ხოლო ეს ფაქტი და ის გამოცდილება, რაც ჩვენ აქ მივიღეთ, აღებს ძალიან ბევრ კარს და იძლვევა უსაზღვრო შესაძლებლობებს ჩვენი გუნდის და კომპანიის წინსვლისათვის!

კახა გელაშვილი, Payze-ს თანადამფუძნებელი.

სტარტაპის თანადამფუძნებლის თქმით, YCombinator-ის გუნდმა დაუდასტურათ, რომ Payze რეგიონში პირველი სტარტაპია, რომელმაც გაიარა ელიტარული აქსელერაციის ეს პროგრამა ისეთი კომპანიების შემდეგ, როგორებიც არიან Dropbox, Airbnb და Stripe.

Payze პროგრამული უზრუნველყოფის პლატფორმაა ინტერნეტბიზნესის მართვისთვის. ის დიდ თუ მცირე ბიზნესის მფლობელებს დროის დაზოგვასა და ბიზნესის ეფექტიანად მართვაში უწყობს ხელს.

პლატფორმა გადახდების სისტემას იმდენად ამარტივებს, რომ იმ შემთხვევაშიც კი, თუ თქვენ მაღაზიას არ ფლობთ და თქვენს პროდუქტს სოციალური ქსელების მეშვეობით ყიდით, Payze-ს დახმარებით საშუალება გექნებათ, დააგენერიროთ გადახდის ბმულები, პროდუქციის ფოტოს აღწერაშივე მიუთითოთ ბმული, რომელზე გადასვლის შემდეგაც მომხმარებელი გადაიხდის თანხას და ეს ინფორმაცია თქვენს ელ-ფოსტაზე ან ტელეფონზე მოვა შეტყობინების სახით. შეტყობინებაში კი იქნება გადახდის ინფორმაცია სრულად და მისამართი, სადაც ესა თუ ის პროდუქტი უნდა გაგზავნოთ.

Payze საქართველოს ბანკის მხარდაჭერითა და საქართველოს ტექნოლოგიებისა და ინოვაციების სააგენტოს ინიციატივით გამართული 500 Startups-ის აქსელერაციის პროგრამის გამარჯვებულიცაა.