ნაციონალური მოძრაობის თავმჯდომარე დღეს კახეთში ჩავიდა, საიდანაც თქვა, რომ თელავიდან შეუჩერებელი კამპანია დაიწყო. მელიას განცხადებით, პარლამენტში შესვლა-არშესვლის გადაწყვეტილებას პარტიის წევრებთან და მხარდამჭერებთან შეხვედრის შემდეგ მიიღებს.

"ყველა ჩვენს მეგობარს, თანაპარტიელს, ჩვენს პარტნიორ პარტიის თავმჯდომარეს, კოლეგებს ა.შ., როდესაც შევხვდები, ამის შემდეგ გამოვაცხადებ გადაწყვეტილებას...

მართლა ყველა სოფელში მინდა შესვლა. თუ ჩვენ ვთანხმდებით, რომ ოლიგარქიული რეჟიმი საფრთხეა, ეს არის საფრთხე ეროვნული უსაფრთხოებისთვის, ეს არის საფრთხე ეროვნული უსაფრთხოებისთვის, სოციალური უსაფრთხოებისთვის, ამასთან შემრიგებლობა არ შეიძლება, ამასთან ბოლომდე ბრძოლის გარეშე გამარჯვება არ მოიპოვება. შეიძლება ითქვას, თელავიდან დავიწყე შეუჩერებელი კამპანია, რომელიც დასრულდება მაშინ, როდესაც დასრულდება ივანიშვილის რეჟიმი. ამის პირობას ვდებ", — ამბობს ნიკა მელია.

ნაციონალურ მოძრაობას პარლამენტში შესვლის საკითხზე გადაწყვეტილება ჯერ არ მიუღია. ექსპრეზიდენტ მიხეილ სააკაშვილთან 22 მაისს გამართული შეხვედრიდან დაბრუნების შემდეგ მელიამ თქვა, რომ თვის ბოლოსთვის ისინი უკვე მზად იქნებიან მიიღონ ის გადაწყვეტილება, რომელიც არის მისაღები.

მისივე თქმით, მას მიხეილ სააკაშვილთან ნაყოფიერი დისკუსია ჰქონდა, რომლის შედეგებს საზოგადოება იხილავს. მელია სააკაშვილთან შესახვედრად კიევში 16 მაისს გაფრინდა.