საქართველო წლევანდელ ევროვიზიას გამოეთიშა, თუმცა, ამით ქვეყნის კონკურსზე მონაწილეობის გარშემო ხმაური არ დასრულებულა.

ევროვიზია 2021-ის მეორე ნახევარფინალის შემდეგ სოციალურ ქსელებში განსახილველ თემად იქცა არა მხოლოდ ქვეყნის ზედიზედ მეოთხე წარუმატებელი მცდელობა, არამედ სხვა ქვეყნების კომენტატორების მიერ გაკეთებული განცხადებები. ყურადღების ცენტრში მოექცა შვედეთის მაუწყებლის პირდაპირი ტრანსლაციის დროს, საქართველოს წარმომადგენლის სცენაზე გამოსვლამდე შვედი კომენტატორების — ედვარდ აფ სილენისა და კრისტერ ბიორკმანის — მიერ გაკეთებული შესავალი.

"საიდან მოდის სახელი Georgien (შვ. საქართველო), განხილვის საკითხია, მაგრამ, რამდენადაც მე გავიგე, სავარაუდოდ, ეს სიტყვა სპარსულად მგელს ნიშნავს. ქართული ენა უნიკალურ ანბანს გამოიყენებს, რომლითაც მის გარდა სხვა არცერთი ენა არ სარგებლობს... როგორც ხედავთ, ქართველი შემსრულებლის შესახებ ბევრი არაფერია სათქმელი.

იგი როკმომღერალია, რომელმაც ქვეყნის X ფაქტორში გაიმარჯვა. აქ კი, როტერდამში, მეტად უცნაური კვირა ჰქონდა. თითქოს, აქ ყოფნა არც სურდა. რეპეტიციების დროს სცენაზე აქეთ-იქით დააბოტებდა და ხუმრობით თავის სიმღერას უცნაური ხმაში ასრულებდა. არათავაზიანი იყო ჟურნალისტების მიმართაც. გულწრფელად რომ ვთქვათ, წელს იგი ძილისმომგვრელი ბალადით წარდგება, რომლის ტექსტიც ასეთია: 'შენი, შენი ხმის გაგონება მსურს'".

შვედი კომენტატორი ერთადერთი არაა, ვინც საქართველოს წარმომადგენლის უცნაურ ქცევაზე გაამახვილა ყურადღება. თორნიკე ყიფიანის პირველი რეპეტიციის შემდეგ, რომელსაც პრესის წარმომადგენლებიც ესწრებოდნენ, მათი დიდი ნაწილი უკმაყოფილო და შეურაცხყოფილიც კი დარჩა.

INFE Greece-ის ცნობით, ჟურნალისტების ნაწილმა თორნიკე ყიფიანის ქცევა უპატივცემულობად მიიჩნია.

"მესამე მცდელობისას მან რეპეტიციის გამასხარავება გადაწყვიტა, ხან ოქტავით დაბლა მღეროდა, ხანაც — ოქტავით მაღლა, ზოგჯერ, საერთოდ უაზრობას ბუტბუტებდა. რამდენიმე ჟურნალისტს ეს 'საყვარლობად' ეჩვენა, თუმცა, დანარჩენები გაღიზიანდნენ და ამგვარი ქცევა კონკურსისადმი უპატივცემულობად შეაფასეს. განსაკუთრებით, გასულ თვეებში მიღებული ასობით უარყოფითი კომენტარის შემდეგ, საქართველოს მიზანი პატივისცემის მოპოვება უნდა ყოფილიყო. კომენტარს არ გავაკეთებთ..."

"ასობით უარყოფით კომენტარში" მარტში განვითარებული მოვლენები იგულისხმება, როცა საკონკურსო სიმღერისადმი გამოთქმული უარყოფითი შეფასებების შემდეგ, თორნიკე ყიფიანმა, საკუთარ ფეისბუქგვერდზე პოსტი გამოაქვეყნა, სადაც კონკურსს "კურკლშოუ" უწოდა, სიმღერის კრიტიკოსების მიმართ კი შეურაცხმყოფელი ფრაზა გამოიყენა. ამ ფაქტის მერე ევროვიზიის ქართველმა და უცხოელმა გულშემატკივრებმა კონკურსანტის დისკვალიფიკაცია მოითხოვეს და პეტიციაც კი შექმნეს.

INFE Greece-ის გარდა საქართველოს რეპეტიციას უარყოფითად გამოეხმაურნენ ევროვიზიის მიმომხილველი სხვა გამოცემებიც. მათ შორის, ერთ-ერთი ყველაზე ცნობილი ონლაინჟურნალი, Wiwibloggs. შენიშვნები მსგავსი იყო: მომღერალი გამიზნულად იწვრილებდა ან იბოხებდა ხმას, "თითქოს ჰელოუინზე ყოფილიყო". ჟურნალისტების თქმით, ამგვარად ყიფიანი, შესაძლოა, აუდიტორიის "გამასხარავებას" ცდილობდა, ან — მათ დაცინვას, ვინც სცენაზე მაღალი ნოტების აღება სცადა.

ჯერჯერობით უცნობია, რომელი ადგილი დაიკავა საქართველომ ნახევარფინალურ ტურში, სადაც 17 ქვეყნის წარმომადგენელი იღებდა მონაწილეობას. კონკურსის საბოლოო შედეგები კვირას, ფინალის შემდეგ გამოქვეყნდება.

ევროვიზიის სიმღერის კონკურსი 2021 გრძელდება. შაბათს, 22 მაისს კონკურსის გრანდიოზული ფინალი გაიმართება, სადაც რიგით 65-ე ევროვიზიის გამარჯვებულის ვინაობას გავიგებთ.

საქართველო საერთაშორისო მუსიკალურ კონკურსზე 2007 წლიდან მონაწილეობს. ამ დრომდე ქვეყნის საუკეთესო შედეგი მე-9 ადგილია, რომელიც 2010 და 2011 წლებში დაიკავეს საქართველოს მაშინდელმა წარმომადგენლებმა: სოფო ნიჟარაძემ და ჯგუფმა Eldrine-მა.

ბოლოს ქვეყანამ ნახევარფინალიდან ფინალში გადასვლა 2016 წელს მოახერხა, როცა სტოკჰოლმში გამართულ კონკურსზე საქართველო ნიკა კოჩაროვმა და Young Georgian Lolitaz-მა წარადგინეს.