დღეს, 21 მაისს, საჯაროდ პირველად გამოიცემა ზაქარია ფალიაშვილის მიერ მე-19 საუკუნეში დაწერილი მესა. ეს ერთადერთი ქართული კათოლიკური მესის ნიმუშია ქართულ მუსიკაში. წიგნის პრეზენტაცია პეტრე და პავლე მოციქულთა ეკლესიაში შედგება, რომელიც ჯავახიშვილის #55-ში მდებარეობს.

ზაქარია ფალიაშვილის აქამდე უცნობი გამოცემის პრეზენტაცია მუზეუმების კვირეულის ფარგლებში იმართება, რომელიც მუზეუმის საერთაშორისო დღეს, 18 მაისს დაიწყო. მასალები, რომელთა კულტურული ღირებულებაც შეუფასებელია, აქამდე სამუზეუმო ფონდებსა და საცავებში იყო დაცული. მის პრეზენტაციას თბილისის მუზეუმების გაერთიანება აწყობს, რომლის მისიაც სწორედ საქართველოს მდიდარი კულტურული მემკვიდრეობის შენახვა, დაცვა, ღირსეულად წარმოჩენა და საზოგადოებისთვის გაცნობაა.

"გამოცემა წარმოაჩენს ზაქარია ფალიაშვილის ცხოვრებისა და შემოქმედების განმსაზღვრელ ფაქტორს, მისი სულიერების იმ მნიშვნელოვანი ნაწილის შესწავლა-ანალიზს, რომელიც კათოლიკური წესის მესას უკავშირდება", — წერია მუზეუმების გაერთიანების კვირეულის აფიშაზე.

გამოცემის პრეზენტაცია დღეს, 4 საათზე დაიწყება და 30 წუთი გაგრძელდება.

მესა კომპოზიტორმა შემოქმედების ადრეულ წლებში დაწერა. თბილისის მუზეუმების გაერთიანების ზაქარია ფალიაშვილის სახლ-მუზეუმის ხელნაწერ ფონდში მისი შექმნილი მესის სამი სხვადასხვა ეგზემპლარი ინახება, რომლებიც 1895-1900 წლებით თარიღდება. სამივე ხელნაწერი, კათოლიკური კანონიკის თანახმად, ექვსნაწილიანია.

გამოცემაში შესული მდიდარი ფოტომასალა და ავტორთა მნიშვნელოვანი სამეცნიერო კვლევები მოგვითხრობს დიდი კომპოზიტორის ცხოვრების ღირსშესანიშნავი ფაქტების, შემოქმედებასთან დაკავშირებული მოვლენებისა და მსოფლმხედველობის შესახებ.

კვლევითი მასალები შექმნილია თბილისის მუზეუმების გაერთიანებისა და თბილისის ვანო სარაჯიშვილის სახელობის სახელმწიფო კონსერვატორიასთან თანამშრომლობის შედეგად. ფალიაშვილის შემოქმედების შესწავლის გარდა, მას მნიშვნელობა ენიჭება ქართული კულტურის ტოლერანტობის ასპექტშიც და გვახსენებს, რომ საქართველოს წარსულისა და ისტორიის შესწავლა ქვეყანაში მოღვაწე კათოლიკეების გარეშე შეუძლებელია.