შინაგან საქმეთა მინისტრის ვახტანგ გომელაურის განცხადებით, დმანისში არსებული ვითარება ეთნიკურ დაპირისპირებაში არ უნდა გადაიზარდოს. როგორც მინისტრმა აღნიშნა, კანონის დამრღვევი კანონის სრული სიმკაცრით დაისჯება. შინაგან საქმეთა მინისტრი დმანისში ჩავიდა.

"ტელევიზორს ვუყურებთ და ჩანს, ვინ რა განცხადებებს აკეთებს. ამ თემას [ეთნიკურ დაპირისპირებას] არ დავუშვებთ არც ერთ შემთხვევაში. ეთნიკურად აზერბაიჯანელები არიან ჩვენი მოქალაქეები, პირველ რიგში. მეორეც, აზერბაიჯანი ჩვენი სტრატეგიული მოკავშირეა, ჩვენი მეზობელია და ჩვენი მეგობრები არიან. ეს არის ქვეყნის მტრობა პირდაპირ რომ ვთქვათ, ვინც ამბობს, რომ ეს არის ეთნიკური თემა", — თქვა გომელაურმა.

მინისტრის თქმით, გუშინდელი დღიდან დმანისში პოლიცია გაძლიერებული იყო, თუმცა ეს არ აღმოჩნდა საკმრისი.

დაპირისპირება დმანისში გრძელდება. მედიებით გავრცელებულ კადრებში ჩანს, რომ მოქალაქეები ერთმანეთს ფიზიკურად რამდენჯერმე დაუპირისპირდნენ. იქ დაძაბულობა 16 მაისს დაიწყო. დმანისის მერმა, გიორგი ტატუაშვილმა On.ge-ს განუცხადა, რომ "ჩვეულებრივი ჩხუბი იყო ახალგაზრდებში". მისივე ცნობით, მომხდარზე საგამოძიებო მოქმედებები მიმდინარეობს.

შინაგან საქმეთა სამინისტრო დმანისში შეკრებილ მოქალაქეებს მოუწოდებს, შეინარჩუნონ სიმშვიდე, რათა ყოფით ნიადაგზე დაწყებული კონფლიქტის ხელოვნურად ეთნიკურ დაპირისპირებაში გადაზრდას არ შეუწყონ ხელი.