ისრაელსა და ღაზის სექტორში სარაკეტო თავდასხმები მთელი ღამის განმავლობაში გრძელდებოდა. ღაზის სექტორის ჯანდაცვის მინისტრის ცნობით, დაღუპულ პალესტინელთა რიცხვი 109-მდე გაიზარდა, მათ შორის, 28 ბავშვი და 15 ქალია. ამასთან, დაშავებულია 621 ადამიანი.

ღაზის სექტორი

ფოტო: AFP

ისრაელის თავდაცვის ძალების განცხადებუთ კი, დაიღუპა 7 ისრაელის მოქალაქე, მათ შორის, 6 წლის ბავშვი. დაშავებულია 523 ადამიანი. უწყების ინფორმაციით, დაპირისპირების დაწყებიდან დღემდე ჰამასმა ისრაელის მიმართულებით 1 750-მდე რაკეტა ისროლა. საპასუხოდ, ისრაელმა 650 რაკეტა გაუშვა ღაზის სექტორის მიმართულებით.

13 მაისის საღამოს შეტევებს ახორციელებდა ღაზის სექტორიც. კერძოდ, ისრაელის მედიის ცნობით, მათ რაკეტები გაუშვეს ისრაელის ცენტრისა და სახმრეთისკენ, მათ შორის, ბენ გურიონის აეროპორტის, შფელას რეგიონისა და თელ-ავივის მიმართულებით. რაკეტების სამიზნე იყო აშდოდი და აშკელონიც. თავდაცვის უწყების ცნობით, რაკეტების უმრავლესობას რკინის გუმბათის სარაკეტო თავდაცვის სისტემით ანეიტრალებდნენ.

საპასუხო დარტყმებს ახორციელებდა ისრაელიც. Times of Israel-ის ცნობით, ისრაელმა ღაზის სექტორის მიმართულებით მხოლოდ რამდენიმე წუთში გაუშვა 150-ზე მეტი რაკეტა.

იერუსალიმსა და ღაზის სექტორში ვითარება რამდენიმე დღეა დაძაბულია. 10 მაისს დაჯგუფება ჰამასმა იერუსალიმზე სარაკეტო თავდასხმა განახორციელა. საპასუხოდ, ისრაელმა ღაზის სექტორზე საჰაერო იერიში მიიტანა. 11 მაისს ღაზის სექტორმა დაბომბა თელ-ავივიც.

სიტუაცია დაიძაბა ქალაქ ლოდშიც. მედიების ცნობით, გვიან ღამით პალესტინელი ახალგაზრდები ქუჩებში გამოვინენ — დაწვეს სინაგოგები, მაღაზიები და ათეულობით მანქანა. მთავრობამ საგანგებო მდგომარეობა გამოაცხადა და სიტუაციის განსამუხტად ქალაქში სასაზღვრო პოლიცია გაიგზავნა.

ამავე თემაზე: