ტოსკანაში 23 წლის ქალს, შეცდომით, კორონავირუსზე ფაიზერის 6 დოზა ვაქცინა გაუკეთეს. როგორც საავადმყოფოს წარმომადგენლები ამბობენ, შეცდომის შემდეგ მას გვერდით ეფექტებზე 24 საათის განმავლობაში აკვირდებოდნენ. პაციენტი თავს კარგად გრძნობდა და ის სახლში უკვე გაწერეს.

მედპერსონალმა, რომელმაც ქალს ვაქცინა გაუკეთა, შემთხვევით საინექციო შპრიცი სრულად აავსო ვაქცინის სითხით, თუმცა შეცდომა მაშინვე აღმოაჩინა, როცა ფლაკონი ცარიელი დაინახა.

პაციენტი საავადმყოფოში ფსიქოლოგიის დეპარტამენტში სტაჟიორად მუშაობს. საავადმყოფოში აცხადებენ, რომ პაციენტის სისხლში ანტისხეულებს რეგულარულად შეამოწმებენ და იმის მიხედვით გადაწყვეტენ, დასჭირდება თუ არა ვაქცინის მეორე დოზა.

კლინიკის წარმომადგენელი დასძენს, რომ შეცდომა უნებლიე იყო და ექიმს ის განზრახ არ ჩაუდენია, თუმცა, გამოძიება მიმდინარეობს.

აპრილის დასაწყისში იტალიის მთავრობამ გამოსცა ბრძანებულება, რომელიც სამედიცინო სფეროში დასაქმებულისთვის ვაქცინას სავალდებულოს ხდის. მისი მიზანი ექიმებისა და პაციენტების დაცვაა.

ის ექიმები, რომლებიც ვაქცინის გაკეთებაზე უარს იტყვიან, მოვალეობებს ვეღარ შეასრულებენ და პაციენტებთან კონტაქტი აეკრძალებათ. ისინი, შესაძლოა, ანაზღაურების გარეშეც გაათავისუფლონ სამსახურიდანაც. უცნობია, აისახა თუ არა ბრძანებულება კონსტიტუციაში.

იტალიას კორონავირუსის პანდემიის პირველი ტალღა უმძიმესად შეეხო. ქვეყანაში 4 მილიონზე მეტი ადამიანი დაინფიცირდა და 123 ათასი გარდაიცვალა.