საქართველოს პრეიზენტის, სალომე ზურაბიშვილის პრესსამსახურის ცნობით, საქართველოსა და ჩრდილოეთ მაკედონიის რესპუბლიკის პრეზიდენტებმა ხელი მოაწერეს შეთანხმებას, რომლის თანახმად საქართველოს მოქალაქეები ჩრდილოეთ მაკედონიაში უვიზო მიმოსვლას შეძლებენ. საქართველოსა და ჩრდილოეთ მაკედონიის რესპუბლიკის მთავრობებს შორის ვიზის მიღების ვალდებულებისაგან გათავისუფლების შესახებ დოკუმენტს ხელი დღეს, 10 მაისს მოეწერა.

"შეთანხმება ბიომეტრიული პასპორტის მქონე პირთათვის ვიზის გარეშე ქვეყნის ტერიტორიაზე შესვლის, გაჩერებისა თუ ტრანზიტული გადაადგილების უფლების მინიჭებას ითვალისწინებს", — აცხადებენ საქართველოს პრეზიდენტის ადმინისტრაციაში.

მათივე ცნობით, საქართველოს კულტურის, სპორტისა და ახალგაზრდობის მინისტრმა თეა წულუკიანმა და ჩრდილოეთ მაკედონიის კულტურის მინისტრმა, ირენა სტეფოსკამ კულტურის სფეროში ურთიერთთანამშრომლობის შესახებ მემორანდუმი გააფორმეს.

"მემორანდუმი, ასევე, ითვალისწინებს პირდაპირი კონტაქტების დამყარების წახალისებას კულტურის სფეროს სხვადასხვა მიმართულებით, კერძოდ: ლიტერატურა და საგამომცემლო საქმიანობა, საბიბლიოთეკო საქმიანობა, ვიზუალური ხელოვნება, მუსიკა, კინო, თეატრი და კულტურული მემკვიდრეობის დაცვა", — ნათქვამია ზურაბიშვილის ადმინისტრაციის განცხადებაში.

დღეს საქართველოს პრეზიდენტი, სალომე ზურაბიშვილი ჩრდილოეთ მაკედონიის რესპუბლიკის პრეზიდენტ სტევო პენდაროვსკის პირისპირ და გაფართოებულ ფორმატში შეხვდა.

პრეზიდენტის პრესსამსახურის ინფორმაციით, შეხვედრისას მხარეებმა რეგიონში უსაფრთხოების კუთხით არსებული ვითარება, პანდემიით გამოწვეული ეკონომიკური და სოციალური სირთულეები და ვაქცინაციის პროცესის მიმდინარეობა განიხილეს.

"ასევე, საქართველოს პრეზიდენტმა ჩრდილოეთ მაკედონიის პრეზიდენტს ინფორმაცია მიაწოდა საქართველოში არსებული პოლიტიკური ვითარებისა და პოლიტიკური კრიზისის დასაძლევად ევროკავშირის შუამავლობით მიღწეული უმნიშვნელოვანესი შეთანხმების შესახებ.

სალომე ზურაბიშვილმა დეტალურად ისაუბრა საქართველოს ოკუპირებულ ტერიტორიებზე შექმნილი მძიმე ჰუმანიტარული მდგომარეობაზე, ადამიანთა გატაცებაზე, უკანონო პატიმრობასა და ზაზა გახელაძის შესახებ", — აცხადებენ პრეზიდენტის ადმინისტრაციაში.

მათივე ცნობით, შეხვედრისას საუბარი შეეხო 14 ივნისს დაგეგმილ NATO-ს სამიტს, საქართველოს ნატო-სა და ევროკავშირში ინტეგრაციის პროცესსა და ამ მიმართულებით ჩრდილოეთ მაკედონიის მხარდაჭერის მნიშვნელობას.

მხარეებმა ისაუბრეს ასევე, რეგიონსა და უკრაინაში მიმდინარე მოვლენებზე და აღნიშნეს, რომ დეესკალაციისთვის საჭიროა საერთაშორისო თანამეგობრობის, NATO-სა და ევროკავშირის უფრო აქტიური ჩართულობა არაკონფრონტაციული ფორმით.

ზურაბიშვილმა ჩრდილოეთ მაკედონიის რესპუბლიკის პრეზიდენტი საქართველოში მოიწვია.

საქართველოს პრეზიდენტის ოფიციალური ვიზიტი ჩრდილოეთ მაკედონიაში 10 მაისს დაიწყო. ზურაბიშვილის ოფიციალური დელეგაციის შემადგენლობაში არიან:

  • პრეზიდენტის ადმინისტრაციის უფროსი, ნათია სულავა;
  • საქართველოს პარლამენტის წევრი, ჩრდილოეთ მაკედონიასთან მეგობრობის საპარლამენტო ჯგუფის ხელმძღვანელი, გივი მიქანაძე;
  • კულტურის, სპორტისა და ახალგაზრდობის მინისტრი, თეა წულუკიანი;
  • საგარეო საქმეთა მინისტრის მოადგილე, ვახტანგ მახარობლიშვილი;
  • საქართველოს ელჩი ჩრდილოეთ მაკედონიაში, თამარ ლილუაშვილი;
  • პრეზიდენტის მრჩეველი განათლების, კულტურისა და მეცნიერების საკითხებში კონსტანტინე ნაცვლიშვილი
  • და საგარეო საქმეთა სამინისტროს ევროპის დეპარტამენტის დირექტორი, ნინო ბარათაშვილი.

ოფიციალური ვიზიტის ფარგლებში, დაგეგმილია შეხვედრები, ასევე, ასამბლეის პრეზიდენტ ტალატ ჯაფერისთან და ვიცეპრემიერ არტან გრუბისთან.

საქართველოს პრეზიდენტის დახვედრის ოფიციალური ცერემონი ვილა ვოდნოს პრეზიდენტის სასახლეში გაიმართა.

დაგეგმილია ასევე, შეხვედრები ჩრდილოეთ მაკედონიაში მოღვაწე სპორტსმენებთან და კულტურის სფეროს წარმომადგენლებთან.

პრეზიდენტის ოფიციალური ვიზიტი ჩრდილოეთ მაკედონიაში 11 მაისს დასრულდება.