ქართული ოცნების საზოგადოებასთან ურთიერთობის მდივანი, შალვა პაპუაშვილი აცხადებს, რომ ნაციონალური მოძრაობა და "მისი ვირტუალური ლეგიონი" ცდილობს, პარტიის თავმჯდომარის, ნიკა მელიას გირაოზე დათანხმება "ციხიდან ღირსეულ გამოსვლად გააფორმონ".

"რა აურაცხელ სტატუსში იხარჯება ნაციონალური მოძრაობა და მისი ვირტუალური ლეგიონი, რომ ნიკა მელიას მიერ გირაოზე დათანხმება, რომელზე არდათანხმების გამოც იყო წინასწარ პატიმრობაში, რამენაირად ციხიდან ღირსეულ გამოსვლად გააფორმონ", — წერს პაპუაშვილი საკუთარ ფეისბუქგვერდზე.

მისი თქმით, ნაციონალურმა მოძრაობამ საკუთარ თავს ღირსეული გამოსავალი არ დაუტოვა.

"სამწუხარო სანახავია, მაგრამ ფაქტია, რომ მათ არც ნიკა მელიას და არც საკუთარ თავს, დიდი ხანია, ღირსეული გამოსავალი აღარ დაუტოვეს და ახლა, მისი და საკუთარი თავების, ამ სირცხვილიდან გამოძვრენას ცდილობენ, რომელიც, ნაწილობრივ, საკუთარ ქვეყანასაც აკადრეს.

ვერ დამიჭერთო, დაიჭირეს; ვერ გადამიხდითო, გადაუხადეს; ამნისტიაზე ვერ დამითანხმებთო — არც მაგაზე იტყვის უარს", — აცხადებს პაპუაშვილი.

დღეს, 8 მაისს ევროკავშირმა ნიკა მელიას გირაოს თანხა გადაიხადა. გადარიცხვა საქართველოს ახალგაზრდა იურისტთა ასოციაციის შუამავლობით განხორციელდა.

ახლა პროკურატურამ უნდა მიმართოს სასამართლოს აღკვეთის ღონისძიების შეცვლის შუამდგომლობით, რათა მელიას პატიმრობა გირაოთი შეეცვალოს. პროკურატურაში აცხადებენ, რომ თანხა ჯერ არ ასახულა და როცა აისახება, დაიწყებენ შესაბამის პროცედურებს.

საქართველოს ახალგაზრდა იურისტთა ასოციაციაში განმარტავენ, რომ პროცედურების დასაწყებად თანხის ასახვა არაა საჭირო. მეტიც, საია-ს თავმჯდომარის, ნიკა სიმონიშვილის განმარტებით, პროკურატურას აქამდეც შეეძლო ამ პოროცედურის დაწყება.

გაიგეთ მეტი: