ალბათ, ყველაზე ცნობილი სამედიცინო სერიალის — გრეის ანატომიის ერთგული მაყურებლები უკვე მიჩვეულები არიან საყვარელ პერსონაჟებთან გამომშვიდობებას, თუმცა როგორც ყოველთვის, ამჯერადაც მოულოდნელად დაატყდათ თავს სამწუხარო ცნობა.

მსახიობი ჯესი უილიამსი ABC-ის საკულტო სამედიცინო შოუს ტოვებს. ეს ინფორმაცია გრეის ანატომიის მე-17 სეზონის სულ ახალ, მე-14 სერიაში გახდა ცნობილი. მისი პერსონაჟი, ჯექსონ ეივერი ბოლოჯერ გამოჩნდება Tradition-ის (ტრადიცია) სახელწოდების მქონე შემდეგ ეპიზოდში, რომელიც 20 მაისს გამოვა.

ჯესი უილიამსი სერიალის სამსახიობო გუნდს მეექვსე სეზონიდან შეუერთდა და 11 წლის განმავლობაში 12 სეზონში იღებდა მონაწილეობას. ამ პერიოდში მისი პერსონაჟი მაყურებლის ერთ-ერთ ფავორიტ გმირად იქცა და ჯექსონ ეივერთან გამომშვიდობებაც ყველას გაუჭირდება.

"მუდამ მადლიერი ვიქნები იმ უსაზღვრო შესაძლებლობებისთვის, რომლებიც შონდამ, ტელევიზიამ, სტუდიამ, თანაგუნდელებმა და შემოქმედებითმა გუნდმა გამიზიარა. როგორც მსახიობი, რეჟისორი და პიროვნება, უზომოდ იღბლიანი ვიყავი, რომ უამრავი ვინმესგან ბევრი რამის სწავლა შემეძლო და ასევე მადლობა ჩვენს შესანიშნავ ფანებს, რომლებიც სტიმულს გვაძლევენ და ჩვენს შრომას აფასებენ. ის სიმტკიცე და გამოცდილება, რომელიც წამყვან ტელევიზიაში თითქმის 300-საათიანმა მონაწილეობამ შემძინა, ძვირფასი ძღვენია, რომელსაც ყოველთვის გავუფრთხილდები", — განაცხადა მსახიობმა შოუდან წასვლის შესახებ.

სამწუხაროსთან ერთად გრეის ანატომია მოულოდნელად სასიამოვნო სიურპრიზებითაცაა სავსე ხოლმე, ამიტომ ვინ იცის, იქნებ ოდესმე კიდევ ვიხილოთ ჯექსონ ეივერი.