როცა ქუჩაში მიდიხარ და მტრედს ან ბეღურას მოკრავ თვალს, ალბათ ისიც გიფიქრია, თუ როგორია მათი ყოველდღიურობა. ზოგ მათგანს ულხინს, ზოგსაც უჭირს და ზოგჯერ დახმარებაც სჭირდებათ. თუმცა, დასახმარებლად, აუცილებელია, მათ შესახებ ბევრი რამ იცოდე: სად ბინადრობენ, როგორ იქცევიან ბუნებაში და ადამიანთან.

სწორედ ამ ცოდნის მიღებაში დაგეხმარება თბილისის ზოოპარკის უფასო ტრენინგი.

14-დან 18 წლამდე მოზარდებისთვის განკუთვნილი ტრენინგი ურბანული ფრინველების შესახებ 29 და 30 მაისს გაიმართება. პროექტი, რომელსაც თბილისის ზოოპარკი კონსერვაციული განათლების კლუბთან და აშშ-ის სატყეო სააგენტოსთან ერთად ახორციელებს, მონაწილეებისთვის ეკოლოგიურ საკითხებზე, კონკრეტულად კი ურბანული ფრინველების შესახებ ინფორმაციის მიწოდებას ისახავს მიზნად.

ფოტო: Didssph / Unsplash

სწავლების მონაწილეები 4 ნაკადად დაიყოფიან, თითოეული ნაკადში კი 20 მოზარდი იქნება. ტრენინგი, რომელიც 4 საათის განმავლობაში გაგრძელდება, თბილისის ზოოპარკის ახალ ტერიტორიაზე გაიმართება.

ტრენინგს კიდევ უფრო საინტერესოს ხდის ისიც, რომ იგი არა მხოლოდ თეორიული, არამედ საველე ნაწილისგანაც შედგება. ამდენად, მონაწილეებს პრაქტიკულ გარემოში მუშაობა და დაკვირვებაც შეეძლებათ.

რაც მთავარია, მიღებული ცოდნის დასადასტურებლად მოზარდებს სერტიფიკატებიც გადაეცემათ.

ტრენინგზე რეგისტრაცია 25 მაისამდე გაგრძელდება და ეს შესაძლებელია ტელეფონით ან ონლაინ. ინფორმაციის დაწვრილებით გაგებას თბილისის ზოოპარკის ფეისბუქგვერდზე შეძლებთ.

ასევე იხილეთ: