ჯანდაცვის მინისტრის მოადგილის, თამარ გაბუნიას განცხადებით, 6 მაისს საქართველოში AstraZeneca-ს დამატებითი დოზები შემოვა, რომელიც უკვე აცრილი ადამიანების მეორედ ვაქცინაციას მოხმარდება.

"6 მაისს ქვეყანაში ასტრაზენეკას დამატებითი დოზები შემოვა, რაც აცრილი მოქალაქეების მეორედ აცრას მოხმარდება და ასევე, დარჩება კიდევ ახალი ვაქცინების ჩასატარებლად", — განაცხადა გაბუნიამ.

მისივე თქმით, მოკლე ხანში შესაძლებელია ნოვავაქსის მეტად აქტიურად გამოჩენა ბაზარზე, როგორც კოვაქსის პლატფორმით, ასევე, უშუალოდ ნოვავაქსთან მოლაპარაკების საშუალებით.

"ასევე, გარკვეული დოზები ფაიზერის არის მოსალოდნელი ივნისში კოვაქსის პლატფორმიდან და მიდის მუშაობა ფაიზერთან დამატებითი დოზების შესახებ", — თქვა გაბუნიამ.

AstraZeneca-ს ვაქცინის პირველი, 43 200 დოზა საქართველოში 13 მარტს ჩამოიტანეს.

ჯანდაცვის მინისტრი, ეკატერინე ტიკარაძე მაშინ აცხადებდა, რომ საწყის ეტაპზე 43 200 ადამიანი აიცრებოდა და რადგან ეს ვაქცინა 2 დოზით კეთდება, მეორე დოზას აცრილები გაიკეთებდნენ მაშინ, როცა დამატებითიც შემოვიდოდა. მისივე თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.