აშშ-ს სახელმწიფო მდივანი, ენტონი ბლინკენი 5-6 მაისს უკრაინას სამუშაო ვიზიტით იწვევა. უკრაინის საგარეო საქმეთა სამინისტროს განცხადებით, ბლინკენი მინისტრი დმიტრი კულებას მიწვევით ჩადის.

6 მაისს ბლინკენი და კულება მოლაპარაკებებს გამართავენ და აშშ-უკრაინის პარტნიორობის განვითარებაზე იმსჯელებენ. აშშ-ს სახლემწიფო მდივანი კიევში მას შემდეგ ჩადის, რაც რუსეთმა რამდენიმე კვირის წინ უკრაინის საზღვრებთან ჯარების მობილიზება დაიწყო.

უკვე რამდენიმე კვირაა რუსეთ-უკრაინის საზღვრებთან დაძაბულობაა. ანექსირებულ ყირიმში რუსეთმა სამხედრო ძალები გაზარდა. ადგილზე მინიმუმ 80 000 ჯარისკაცი, ათასობით ტანკი და საბრძოლო მანქანა განალაგეს.

კიევმა მოსკოვი გასული წლის ივლისში გაფორმებული ცეცხლის შეწყვეტის შესახებ შეთანხმების დარღვევაში დაადანაშაულა, კრემლმა კი უკრაინას პროვოკაციების მოწყობაში დასდო ბრალი.

ბოლო ინფორმაციით, 22 აპრილს რუსეთის თავდაცვის სამინისტრომ უკრაინის საზღვრებიდან ჯარების გაყვანის შესახებ განაცხადა. გამოცემა TASS-ის ცნობით, რუსეთის ფედერაციამ სამხრეთ და დასავლეთის რაიონებში მოულოდნელი სამხედრო შემოწმების დასრულება გადაწყვიტა. თავდაცვის მინისტრ სერგეი შოიგუს განცხადებით, ყველა მიზანი მიღწეულია.