ქართული ოცნების დეპუტატის, არჩილ თალაკვაძის განცხადებით, თუ ნაციონალური მოძრაობის თავმჯდომარე, ნიკა მელია გირაოს გადახდის, ეს იმას არ ნიშნავს, რომ მელია საბოლოოდ გათავისუფლდება. თალაკვაძის თქმით, ენმ-ის თავმჯდომარის საბოლოოდ თავისუფლებაზე დასარჩენად ამნისტიაა საჭირო.

"საზოგადოებას ნუ შეიყვანთ შეცდომაში. გირაოს გადახდა ცვლის მხოლოდ წინასწარი პატიმრობის მოცემულობას. ანუ გირაოს თუ გადაიხდის ნიკა მელია, ის დატოვებს წინასწარი პატიმრობიდან უკვე დაწესებულება და მონაწილეობას მიიღებს როგორც სხვა მისი კოლეგები პოლიტიკურ პროცესში, თუმცა ეს მაინც არ ნიშნავს საბოლოოდ, რომ გირაოს გადახდა უზრუნველყოფს მის საბოლოოდ თავისუფლებაზე ყოფნას, ვინაიდან სასამართლომ უნდა მიიღოს გადაწყვეტილება ნიკა მელიას ბრალეულობასთან დაკავშირებით. შესაბამისად, სწორედ ამიტომ ჩვენმა ევროპელმა პარტნიორებმა შემოგვთავაზეს და ჩადეს შეთანხმებაში ამნისტიის პროექტი, რათა საბოლოოდ მოგვარდეს ეს საკითხი და არა შუალედურად... გირაო არ არის იმის გარანტია, რომ ნიკა მელია საბოლოოდ დარჩება თავისუფლებაზე, ამისთვის საჭიროა ამნისტია. თუ ისინი ამნისტიას არ ეთანხმებიან აქ, არის მთელი ხელმომწერი ოპოზიცია, დღეს შეუძლიათ გამოვიდნენ და დააფიქსირონ საკუთარი დამოკიდებულება ამასთან დაკავშირებით", — განაცხადა თალაკვაძემ.

6-თვიანი ბოიკოტის შემდეგ 27 აპრილს ოპოზიციის ნაწილი პარლამენტში მივიდა. პარლამენტში პირველად მივიდნენ: ლელო, სტრატეგია აღმაშენებელი, რესპუბლიკური პარტია, გირჩი — მეტი თავისუფლება, ასევე, ინდივიდუალურად არიან სალომე სამადაშვილი, შალვა შავგულიძე და არმაზ ახვლედიანი. პარლამენტში არ არიან ნაციონალური მოძრაობა და ევროპული საქართველო, ასევე, ლეიბორისტული პარტია.

საკანონმდებლო ორგანოში უკვე არიან გირჩი და მოქალაქეები. მათგან ალეკო ელისაშვილის პარტია უკვე მონაწილეობს საპარლამენტო საქმიანობაში, ხოლო ხვიჩია, მეგრელიშვილი და რაქვიაშვილი აცხადებენ, რომ მხოლოდ საპარლამენტო ტრიბუნას გამოიყენებენ, ასევე, ისარგებლებენ იარაღის ტარების უფლებითა და დეპუტატის იმუნიტეტით.

პარლამენტში მისული ოპოზიცია დღეს, სავარაუდოდ, ამნისტიის შესახებ კანონპროექტს დაარეგისტრირებს, რომელიც შეთანხმების თანახმად, ნაციონალური მოძრაობის თავმჯდომარის, ნიკა მელიას შეეხება. ასევე, დღეს პრეზიდენტი სალომე ზურაბიშვილი გიორგი რურუას შეწყალების აქტს გამოსცემს.

თავდაპირველად, ნაციონალური მოძრაობის თავმჯდომარემ, ნიკა მელიამ შეთანხმებაში გათვალისწინებულ ევროკავშირის მიერ შემოთავაზებულ გირაოზე უარი განაცხადა, თუმცა 26 აპრილს მან გირაოთი გათავისუფლებაზე მზადყოფნა გამოთქვა, იმ შემთხვევაში, თუ ამნისტიის კანონს უკან გაითხოვენ.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა 19 აპრილს მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.