ქალაქ ლინკოლნში ასობით ადამიანი საუცხოო სანახაობისთვის შეიკრიბა: სულ მცირე 50 ადამიანი, სახელად ჯოში საკუთარი სახელის დასაცავად "დაუნდობელ" ბრძოლაში ჩაერთო, რადგან სამყაროს მხოლოდ ერთი ჯოში სჭირდება.

ამ ბრძოლის ისტორია, რომელიც მომავალ თაობებს კიდევ დიდხანს ემახსოვრებათ, 1 წლის წინ, Facebook-ზე დაიწყო, როდესაც ბრძოლის ორგანიზატორმა ჯოშუა სვეინმა უცნობი თანამოსახელეები ფეისბუქ ჩატში შეკრიბა და მოწინააღმდეგეები რთული გამოწვევის წინაშე დააყენა. ამის მიზეზი ის გახდა, რომ ჯოშუა საკუთარ სახელს ონლაინ პლატფორმებსა და სოციალურ ქსელებში ვერ იყენებდა, რადგან ბევრი თანამოსახელე ჰყავდა. პანდემიაში მოწყენილმა კი ამ საკითხის გადასაწყვეტად მშვენიერი ხერხი მოიფიქრა.

"ვინც მოიგებს, სახელის ტარების უფლებას შეინარჩუნებს. დანარჩენებმა სახელი უნდა შეიცვალონ", — განუცხადა საერთო ჩატში შეკრებილ თანამოსახელეებს ორგანიზატორმა.

თავდაპირველად ეგონა, რომ 1 წლის შემდეგ ღონისძიებას არავინ დაესწრებოდა, მაგრამ გადაწყვიტა, ბედი მაინც ეცადა და არც შემცდარა: სათამაშო იარაღებით აღჭურვილი და მებრძოლის ფორმებში გამოწყობილი ადამიანები დათქმულ ადგილას ქვეყნის სხვადასხვა წერტილიდან ჩამოვიდნენ. ბრძოლის მონაწილეები სახელის შენარჩუნებასთან ერთად, ომაჰაში არსებული ბავშვთა ჰოსპიტალისთვის ფულის შეგროვებასაც ისახავდნენ მიზნად.

ფოტო: Kenneth Ferriera / AP

თავდაპირველად ჯოშს ბრძოლის გამართვა სხვა ჯოშ სვეინებთან უნდოდა, თუმცა ასეთი მხოლოდ ერთი გამოცხადდა. სხვა თანამოსახელეებთან ბრძოლის შემდეგ, ორი ჯოშ სვეინი ერთმანეთს განსაკუთრებულ თამაშში, ე.წ. "ჯეირანში" დაუპირისპირდა. გამარჯვება ორგანიზატორმა მოიპოვა.

სახალისო ღონისძიება კოვიდრეგულაციების დაცვით განხორციელდა. ორგანიზატორმა მონაწილეები პირბადეებით უზრუნველყო.

საბოლოოდ, სეხნიების ბრძოლაში 4 წლის ჯოშ ვინსონმა გაიმარჯვა. გამარჯვებულს დიდი გვირგვინი და ჩემპიონის ქამარი გადაეცა. ეს გამარჯვება სიმბოლური აღმოჩნდა, რადგან პატარა ჯოში სწორედ იმ ბავშვთა ჰოსპიტალში მკურნალობდა, რომლისთვისაც მონაწილეები ფულს აგროვებდნენ. ქველმოქმედებისთვის ამ ეტაპზე $11 000-ზე მეტია შეგროვებული.