პარლამენტის თავმჯდომარეობის კანდიდატად ქართულმა ოცნებამ კახა კუჭავა წარადგინა. ის არჩილ თალაკვაძეს შეცვლის, რომელმაც თავმჯდომარის თანამდებობა ახლახანს დატოვა და პარლამენტის ვიცე-სპიკერი გახდა.

"კახას აქვს საპარლამენტო მუშაობის გამორჩეული გამოცდილება. მას აქვს ასევე საერთაშორისო პარტნიორებთან მუშაობის გამორჩეული გამოცდილება, რაც არის ძალიან მნიშვნელოვანი იმისათვის, რომ მან სათანადოდ განახორციელოს სპიკერის ფუნქციები", — განაცხადა ქართული ოცნების თავმჯდომარემ, ირაკლი კობახიძემ და წარმატებები უსურვა კუჭავას.

სიტყვით გამოსვლისას, კუჭავამ მადლობა გადაუხადა თალაკვაძეს გაწეული სამსახურისთვის და გუნდსა და კობახიძეს ნდობის გამოცხადებისთვის.

"ის გამოწვევები, რომლის წინაშეც დგას პარლამენტი ჩვენ უნდა გამოვიყენოთ, როგორც შესაძლებლობა. ჩვენ ორშაბათიდან ვიწყებთ ძალიან მნიშვნელოვან ეტაპს, სადაც ყველა პარტია ერთად უნდა იყოს წარმოდგენილი პარლამენტში და ვიღებდეთ იმ გადაწყვეტილებებს, რომლებიც მნიშვნელოვანია ჩვენი ქვეყნისთვის", — განაცხადა კუჭავამ.

თალაკვაძემ წასვლის მიზეზად ის დაასახელა, რომ აქტიურად იყო ჩართული მოლაპარაკებების პროცესში როგორც მხარე, პარლამენტის თავმჯდომარე კი მიუკერძოებელი უნდა იყოს. კობახიძემ ხაზი გაუსვა იმ ფაქტს, რომ თალაკვაძემ ეს გადაწყვეტილება თავად მიიღო.

"იმის გათავალისწინებით, რომ რამდენიმე თვიანი დაძაბული მოლაპარაკებები დასრულდა შეთანხმებით, რომელშიც პარტიის თავმჯდომარესთან ერთად მე პარტია ქართულ ოცნებას წარმოვადგენდი, ვთვლი, რომ პარლამენტში შემდგომი პოლიტიკური პროცესის სწორად წარმართვისთვის მართებული იქნება დავტოვო სპიკერის პოზიცია და ამ თანამდებობაზე წარვადგინოთ ადამიანი, რომელიც პარლამენტის მუშაობას უფრო ნეიტრალური პოზიციიდან წარუძღვება. შესაბამისად მივიღეთ გადაწყვეტილება, რომ გავაკეთოთ როტაცია.

ახლა, როცა პარლამენტში წარმომადგენლობითი ოპოზიცია გვყავს, ვთვლი, რომ ჩემი ადგილი დარბაზშია, კოლეგების გვერდით და არა სპიკერის პოზიციაზე", — განაცხადა თალაკვაძემ ბრიფინგზე.

თალაკვაძის თქმით, მისთვის პატივი იყო მეცხრე და მეათე მოწვევის პარლამენტში მუშაობა. მან მადლობა გადაუხადა გუნდსა და მოქალაქეებს.

პარლამენტის ვებგვერდზე განთავსებული ინფორმაციის მიხედვით, კუჭავას უმაღლესი განათლება მიღებული აქვს საქართველოსა და ინგლისში. 2001 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი; ხოლო 2003 წელს მიენიჭა კორპორაციული სამართლის მაგისტრის ხარისხი ნოტინგემ ტრენტის უნივერსიტეტის მიერ.

2016 წლიდან კუჭავა არის ფრაქცია ქართული ოცნების წევრი. 2016-2020 წლებში იყო პარლამენტის მე-9 მოწვევის წევრი და ასევე, გარემოს დაცვისა და ბუნებრივი რესურსების კომიტეტის თავმჯდომარე, ხოლო მოგვიანებით აირჩიეს პარლამენტის თავმჯდომარის მოადგილის თანამდებობაზე.

2020 წლის დეკემბრიდან დღემდე არის საქართველოს მე-10 მოწვევის პარლამენტის წევრი და პარლამენტის თავმჯდომარის მოადგილე. 2021 წლის იანვრიდან კი კახა კუჭავა ქართული ოცნების პოლიტიკური საბჭოს წევრია და იკავებს პარტიის საერთაშორისო მდივნის თანამდებობას.