თბილისში ბინის მეპატრონე ლესბოსელ წყვილს თავს დაესხა. აქტივისტების ინფორმაციით, მეპატრონემ ერთ-ერთი იქამდე სცემა, სანამ ქალმა გონება არ დაკარგა. საქმეზე გამოძიება ძალადობის მუხლით დაიწყო, თუმცა აქტივისტები აცხადებენ, რომ მეპატრონე წყვილს ჰომოფობიური ნიშნითაც აყენებდა შეურაცხყოფას.

On.ge-სთან საუბრისას თბილისი პრაიდის აქტივისტი, თამაზ სოზაშვილი აცხადებს, რომ მეპატრონემ კონფლიქტის მიზეზად ხმამაღალი მუსიკა და ხმაური დაასახელა. მისი თქმით, საღამოს 11 საათზე მან ტელეფონში ჩართული მუსიკის ხმა გააპროტესტა, რის შემდეგაც ჰომოფობიური შეძახილები დაიწყო და წყვილზე იძალადა.

"ორივემ მიიღო ემოციური სტრესი, დაბეჟილობები აქვთ იმიტომ, რომ ფეხებით ურტყამდა. იმდენად გამეტებით სცემდა, რომ ერთ-ერთმა გონება დაკარგა.

ადგილზე მაშინვე მივიდა პოლიცია და სასწრაფო. თუ სწორად მახსოვს, სასწრაფო თავად მოძალადემ გამოიძახა, როგორც ჩანს შეეშინდა. პოლიციაში გულგრილად ექცეოდნენ დაზარალებულებს. მიუხედავად იმისა, რომ ძალადობის ფაქტი იყო სახეზე, ბრძოლა დასჭირდათ გოგოებს, რომ შემაკავებელი ორდერი გამოეწერათ მოძალადის მიმართ", — განაცხადა

შინაგან საქმეთა სამინისტროში On.ge-ს განუცხადეს, რომ გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს. მათივე განცხადებით, მეპატრონეს შემაკავებელი ორდერი გამოუწერეს.

ლესბოსელ წყვილზე კიდევ ერთი თავდასხმა მოხდა 20 აპრილს. Tbilisi Pride-ის ინფორმაციით, თბილისში, საკუთარი საცხოვრებელი კორპუსის ეზოში, ლესბოსელ წყვილზე არასრულწლოვანი ბავშვის თანდასწრებით მეზობელმა კაცმა ჰომოფობიურ ნიადაგზე იძალადა. ბრალდებულს პატიმრობის უზრუნველყოფით 3 000 ლარის ოდენობის გირაო შეუფარდეს.