ვინსენტ ვან გოგის ნამუშევრები დღემდე დიდ შთაბეჭდილებას ახდენს ადამიანებზე, თუმცა, კიდევ უფრო შთამბეჭდავი აღმოჩნდა ნიდერლანდელი ფერმწერის ნახატებით ინსპირირებული სანახაობა, რომელიც ცოტა ხნის წინ ჩინეთში გაიმართა.

ტექნოლოგიების მოყვარულმა ჯგუფმა EFYI-მ, ტიანძინის უნივერსიტეტის მხარდაჭერით, ჩინეთის ცაზე დრონების მასშტაბური სანახაობა მოაწყო და გინესის რეკორდიც კი დაამყარა, როგორც უპილოტო საფრენი აპარატის მიერ შესრულებული ყველაზე ხანგრძლივი ანიმაცია.

ანიმაციამ კი, არც მეტი, არც ნაკლები, ვან გოგის ყველაზე ცნობილი ნახატები გააცოცხლა, მათ შორის: ვარსკვლავებიანი ღამე, პურის ყანა კვიპაროსებით, თუთის ხე შემოდგომით, ნუშის ყვავილობა და საძინებელი არლში.

შოუს, რომელიც ლეგენდარული მხატვრის ისტორიას მოჰყვა, "ვან გოგისადმი მიგებული პატივი" ეწოდა.

სანახაობა, როგორც აღვნიშნეთ, რეკორდული დროის განმავლობაში — 26 წუთი და 19 წამი — გაგრძელდა. მიუხედავად იმისა, რომ ტემპერატურა -8°C იყო, შოუ მომაჯადოებელი აღმოჩნდა მაყურებლებისთვის, რომლებიც თვალმოუცილებლად უყურებდნენ მას.

პერფორმანსი Agile Bee II-ის მოდელის დრონებით შესრულდა. თითოეული მათგანი, საშუალოდ 1,4 კილოგრამს იწონის, შეუძლია 32 კმ/სთ სიჩქარის განვითარება და ჰაერში 38 წუთის განმავლობაში გაჩერება.