თუ თავი გამორჩეული ჰოლანდიელი ფერმწერის, ვინსენტ ვან გოგის შემოქმედების გულშემატკივრად მიგაჩნიათ, მაგრამ აღნიშნულ ნახატს პირველად ხედავთ, გული არ გაიტეხოთ: საქმე ისაა, რომ ნამუშევარი, სახელწოდებით Scène de rue à Montmartre (მონმარტრის ქუჩის სცენა) საუკუნეზე მეტია კერძო კოლექციის ნაწილია და აქამდე მხოლოდ კატალოგებში, შავ-თეთრი ფოტოს სახით იყო შეტანილი. ნახატი ფართო საზოგადოებამ თებერვალში იხილა, 25 მარტს კი იგი $15,4 მილიონად გაიყიდა.

აღსანიშნავია ისიც, რომ წინასწარი შეფასებით ნამუშევრის ღირებულება $6 მილიონიდან $9,7 მილიონამდე განისაზღვრებოდა.

ფოტო: Reuters

ვან გოგმა ნამუშევარი 1887 წელს შექმნა, როდესაც პარიზში ძმასთან ერთად ცხოვრობდა. ხელოვანი მონმარტრში ურბანული და სოფლისთვის დამახასიათებელი პეიზაჟების შერწყმით მოხიბლულა, სადაც "წისქვილები კაბარეებს ენაცვლებიან".

ვან გოგის შემოქმედების ექსპერტის, მარტინ ბეილის მიხედვით, აღნიშნული ნახატი მხატვარმა შემოქმედების გარდამავალ პერიოდში შექმნა — მანამ, სანამ საცხოვრებლად პროვანსში გადავიდოდა და უფრო მკვეთრ, მდიდრულ ფერებს აღმოაჩენდა.

"ყველაზე საინტერესო ისაა, რომ ვან გოგის აღნიშნული ნახატი მას შემდეგ იყო დამალული, რაც ხელოვანმა მოლბერტიდან ჩამოხსნა. ის ყოველთვის კერძო კოლექციაში იყო და მის შესახებ მხოლოდ მფლობელებმა და მათმა მეგობრებმა იცოდნენ", — აღნიშნავს მარტინ ბეილი BBC-სთან საუბარში.

ამავე თემაზე: