ერთიანი ნაციონალური მოძრაობის ერთ–ერთმა ლიდერმა, გიორგი გაბაშვილმა პარტიის ოფისში გამართულ პრესკონფერენციაზე თქვა, რომ ენმ-მ სოფელ კორცხელში საარჩევნო უბანთან მომხდარ ფიზიკურ დაპირისპირებაში მონაწილე თავდამსხმელები ამოიცნეს და მათი დამკვეთი ენერგეტიკის მინისტრი კახა კალაძეა:

"ამ ზონდერ-ჯგუფების შემქმნელი და დამფინანსებელი კახა კალაძეა, მთავრობის ვიცე-პრემიერი, მათ უშუალო ხელმძღვანელი კი გიორგი არეშიძეა, სწორედ ის ქირაობს იმ სპორტ-დარბაზს, სადაც იწვრთნებიან ასეთი ცემა-ტყეპისთვის ეს ზონდერები".

გიორგი არეშიძე კახა კალაძეს ცოლის ძმა და თბილისის მერიის განათლების, სპორტისა და ახალგაზრდულ საქმეთა საქალაქო სამსახურის ყოფილი უფროსია.

გაბაშვილმა ჟურნალისტებს მტკიცებულებად ფოტოები წარუდგინა:

"სპორტსმენების რეკრუტირებას ახდენს გეგა გეგეშიძე, რომელიც იყო ჭიკაიძის დაცვის უფროსი, ხოლო მისი ბიძაშვილი და ჭიდაობის ნაკრების წევრი ვლადიმერ გეგეშიძე იყო დღეს მომხდარი ფიზიკური დაპირისპირების მთავარი ინიციატორი" - დასძინა მან.

გიორგი გაბაშვილმა ჟურნალისტებს უჩვენა ფოტო, რომელზეც, მისი თქმით, კახა კალაძესთან ერთად ერთ-ერთი სავარაუდო თავდამსხმელი კობა ტყეშელაშვილია გადაღებული. გაბაშვილის თქმით, ის დღევანდელი თავდასხმის ერთ-ერთი ყველაზე აგრესიული მონაწილე იყო.

გაბაშვილის თქმით, თავდასხმაში მონაწილე 14 პირი იდენტიფიცირებულია და ყველა მათგანი სპორტსმენი და ქართულ ოცნებასთან დაახლოებული პირია.

ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობდა, ნაციონალური მოძრაობის წევრებს, მათ შორის გიგა ბოკერიასა და ნიკა მელიას, დღეს შუადღისას სცემეს.

On.ge ცდილობს ნაციონალური მოძრაობის მიერ გავრცელებული ბრალდების ადრესატებთან დაკავშირებას. დამატებითი ინფორმაციის შემთხვევაში, მკითხველს დაუყონებლივ ვაცნობებთ.