საერთაშორისო გამჭვირვალობა - საქართველო, საგამოძიებო ორგანოებს მოუწოდებს რომ დაუყოვნებლივ დაიწყონ გამოძიება დღეს, 22 მაისს ზუგდიდში მომხდარ ფაქტთან დაკავშირებით და დაადგინოს ჩხუბში მონაწილე პირთა ვინაობა.

ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობს, ნაციონალური მოძრაობის წევრები, მათ შორის, გიგა ბოკერია და ნიკა მელია რამდენიმე საათის წინ ცემეს.

როგორც ორგანიზაციის განცხადებაში წერია, პოლიციამ უნდა უზრუნველყოს საარჩევნო პროცესის უსაფრთხო გარემოში წარმართვა და დაკითხოს ის პირები, რომლებიც ფიზიკურ დაპირისპირებაში მონაწილეობდნენ.

ასევე, საერთაშორისო გამჭვირვალობა - საქართველოში მიიჩნევენ რომ პოლიციის თანამშრომლებს უნდა ჩაუტარდეს შესაბამისი ინსტრუქტაჟი, საარჩევნო უბნებთან მსგავსი ფაქტების აღკვეთის მიზნით.

TI-ის ინფორმაციით, ადგილზე მობილიზებული რამდენიმე პოლიციელი ეცადა სიტუაციის განმუხტვას, თუმცა სიმცირიდან გამომდინარე, მათ ვერ შეძლეს პრევენციული ღონისძიებების დროულად გატარება, ამასთან, დაუდგენელმა პირებმა ტერიტორიის დატოვება შეძლეს ისე, რომ მათი არც დაკითხვა და არც დაკავება სამართალდამცავებს არ მოუხდენიათ.

ორგანიზაცია თავის განცხადებაში აცხადებს, რომ გარკვეული პერიოდის შემდეგ აღნიშნული პირები ისევ დაბრუნდნენ საარჩევნო უბნის მიმდებარე ტერიტორიაზე:

"ამჟამად, პოლიციელთა რაოდენობა საარჩევნო უბანთან გაზრდილია, ადგილზე რჩებიან ერთიანი ნაციონალური მოძრაობის წარმომადგენლებიც. გაუგებარია ამ დრომდე, რატომ არ ახდენს პოლიცია ფიზიკურ დაპირისპირებაში ჩართული პირების დაკავებას და მათ დაკითხვას. მეტიც, პოლიცია მათ არ მოუწოდებს, რომ დატოვონ საარჩევნო უბნის მიმდებარე ტერიტორია".

საერთაშორისო გამჭვირვალობა საქართველოს წარმომადგენლის ცნობით, აღნიშნულმა პირებმა კიდევ არაერთხელ მიაყენეს შეურაცხყოფა იქ შეკრებილ მოქალაქეებს, ადგილობრივი მედიასაშუალების, ტელეკომპანია ოდიშის ჟურნალისტს კი ბოთლი ესროლეს. პოლიციას მომხდარზე რეაგირება ისევ არ მოუხდენია:

"ადგილზე პოლიციის უმოქმედობა ან პოლიციელთა არასაკმარისი რაოდენობა ართულებს საარჩევნო პროცესის მიმდინარეობისას მოქალაქეთა უსაფრთხოების უზრუნველყოფას. მიგვაჩნია, რომ მსგავსი ინციდენტები გავლენას ახდენს არჩევნების პროცესის ჯანსაღ პოლიტიკურ გარემოში ჩატარებაზე. მსგავსი ფაქტების გამოძიების გარეშე დატოვება და პოლიციის უმოქმედობა ხელს შეუშლის მოახლოებული საპარლამენტო არჩევნების მშვიდ და კონკურენტულ პირობებში ჩატარებას, რაც საბოლოოდ ქვეყანაში დემოკრატიისა და მმართველობის ხარიხსზე აისახება".