შინაგან საქმეთა სამინისტროს ინფორმაციით, უკვე დაწყებულია გამოძიება ზუგდიდში ნაციონალური მოძრაობის წევრთა ცემის ფაქტზე. როგორც On.ge-ს საგამოძიებო უწყებაში განუცხადეს, გამოძიება 125–ე მუხლის მიხედვითაა დაწყებული, რაც ცემას გულისხმობს. უწყებაში ჯერჯერობით არ აკონკრეტებენ, დააკავეს თუ არა ვინმე.

ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობს, ნაციონალური მოძრაობის წევრები, მათ შორის, გიგა ბოკერია და ნიკა მელია რამდენიმე საათის წინ ცემეს.

ტელეკომპანია რუსთავი 2–მა გაავრცელა ვიდეომასალა, სადაც ჩანს სპორტული აღნაგობის რამდენიმე პირი, რომლებიც ჟურნალისტის კითხვაზე მიმალვას სირბილით ცდილობენ. მათ ჟურნალისტს უთხრეს, რომ ზუგდიდში დასასვენებლად ჯგუფურად ჩამოვიდნენ.

მოგვიანებით, 2030–მა გამოაქვეყნა ვიდეო, რომელზეც აღნიშნული პირების მიერ ნაცმოძრაობის წევრთა ცემაა აღბეჭდილი.

ადგილობრივი გამოცემა ლაივპრესის ცნობით, სპორტსმენებმა ნაციონალური მოძრაობის წევრები პოლიციის თვალწინ სცემეს და სამართალდამცავებმა ძალადობის აღკვეთა ვერ შეძლეს. მედიასაშუალების მიერ გავრცელებულ ფოტოში ერთი პირს ხელში ჩხუბის დროს ხელკეტი უჭირავს.

პარლამენტის წევრი ნაციონალური მოძრაობიდან, ირმა ნადირაშვილი ფეისბუკზე წერს, რომ ხელისუფლებამ ზუგდიდში თბილისიდან ჩაიყვანა მორაგბეები და მოჭიდაავეები და სწორედ მათ ცემეს პარტიის წევრები.