საბურთალოს რაიონში, დოლიძის ქუჩაზე სროლა იყო. არსებული ინფორმაციით, კურიერის ეკიპირებით მყოფმა ცეცხლი მოპედიდან 10-ჯერ გახსნა. ამის შემდეგ კი, თვითმხილველებმა ის სცემეს. შემთხვევა გუშინ, 20 აპრილს მოხდა.

სოციალურ ქსელში გავრცელდა ინფორმაცია, რომ ცეცხლი, სავარაუდოდ, გლოვოს კურიერმა გახსნა.

Glovo-ში აცხადებენ, რომ ღრმა მწუხარებას გამოთქვამენ მომხდარი ინციდენტის გამო და სამართალდამცავებთან თანამშრომლობის მზადყოფნას გამოთქვამენ.

"მიუხედავად იმისა, რომ ჯერჯერობით უცნობია, ნამდვილად იყო თუ არა შეიარაღებული პირი Glovo-ს პარტნიორი კურიერი, ჩვენ მზად ვართ მჭიდროდ ვითანამშრომლოთ საგამოძიებო უწყებებთან დეტალების გასარკვევად და მივაწოდოთ მათ ჩვენ ხელთ არსებული ყველა ინფორმაცია", — ამბობენ კომპანიაში.

შინაგან საქმეთა სამინისტროში აცხადებენ, რომ დოლიძის ქუჩაზე სროლის საქმეზე ერთი ადამიანი დააკავეს. მათივე თქმით, გამოძიება სისხლის სამართლის კოდექსის 19-108-ით დაიწყო, რაც განზრახ მკვლელობის მცდელობას გულისხმობს. გამოძიება, ასევე, იარაღის მართლსაწინააღმდეგოდ შეძენა-შენახვა-გამოყენების ბრალდებითაც მიმდინარეობს.