ქართული ოცნების დეპუტატის, შალვა პაპუაშვილის განცხადებით, პარლამენტში ამინისტიის კანონი მას შემდეგ უნდა დაინიცირდეს, რაც ევროკავშირში რეგისტრირებული ორგანიზაცია ერთიანი ნაციონალური მოძრაობის ლიდერის, ნიკა მელიას გირაოს გადაიხდის.

"გუშინდელ შეხვედრაზე ჩართული იყო ასევე ბრიუსელიდან მიშელოს წარმომადგენელი და განმარტება გაკეთდა რომ ევროკავშირში რეგისტრირებული ორგანიზაციის მიერ მოხდებოდა გირაოს გადახდა და ამის შემდეგ ინიცირდება ამნისტიის კანონი, რომელსაც ხელმომწერმა პარტიებმა მხარი უნდა დაუჭირონ", — განაცხადა მან.

იგივეს ამბობს კიდევ ერთი დეპუტატი, ირაკლი ქადაგიშვილი.

"ჩვენ ვიცით, რომ იქ [ხელშეკრულებაში] შემოთავაზებული მექანიზმი იყო ესეთი, რომ უნდა მოხდეს გირაოს გადახდა და ამის შემდეგ უკვე პარლამენტში პარტიები, დეპუტატები მივიღებთ პოლიტიკური ამინისტიის აქტს 20 ივნისის მოვლენებთან დაკავშირებით", — აცხადებს ის.

შეთანხმებაში, რომელიც საერთაშორისო პარტნიორების მედიაციით განხორციელდა, წერია, რომ ხელისმომწერები ვალდებულებას იღებენ, ამ შეთანხმების ხელმოწერიდან ერთი კვირის ვადაში, რეაგირება მოახდინონ "პოლიტიზებულ მართლმსაჯულებად" აღქმულ ორ საკითხზე, ამნისტიის საშუალებით და / ან ისეთი ზომების მიღებით, რომელიც ანალოგიურ შედეგს გამოიღებს.

"კერძოდ, ამ შეთანხმების ხელმოწერიდან ერთი კვირის ვადაში, პარლამენტში წარმოდგენილმა პარტიამ უნდა მოახდინოს ინიცირება კანონისა ამნისტიის შესახებ, რომელიც 2019 წლის 19 – 21 ივნისის პროტესტებთან დაკავშირებულ ყველა დარღვევასა და დაკავებას შეეხება", — წერია შეთანხმებაში.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.

ამ დროის მონაცემებით, დოკუმენტს ხელს აწერენ: ქართული ოცნება, ლელო, სრატეგია აღმაშენებელი, ორივე გირჩი, რესპუბლიკური პარტია, ასევე, ინდივიდუალურად აწერენ ხელს ნაციონალური მოძრაობის ერთ-ერთი ლიდერი, სალომე სამადაშვილი და ევროპული საქართველოს ყოფილი თავმჯდომარე, დავით ბაქრაძე. ამ ორი პარტიის სხვა წარმომადგენლები პრეზიდენტის ადმინისტრაციაში ამ დროისთვის არ იმყოფებიან.

ახალ დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც ვადამდელ არჩევნებთან დაკავშირებით ქართული ოცნების წინადადება გაზიარებულია, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: