ნაციონალური მოძრაობის წევრი, აკაკი მინაშვილი ამბობს, რომ ევროპული საბჭოს პრეზიდენტი, შარლ მიშელის მიერ წარმოდგენილ ახალ დოკუმენტთან დაკავშირებით გარკვეული "წუხილები" აქვთ. როგორც მან განმარტა, ეს 20 ივნისის საქმეზე ამნისტიას და ვადამდელ არჩევნებს ეხება.

"კარგია, რომ იქ ორივე პოლიტპატიმარზეა საუბარი, თუმცა ამნისტიასთან დაკავშირებით თქვენ იცით ნიკა მელიას წუხილი, რომ ამნისტია არ უნდა გავრცელდეს ყველა იმ ადამიანზე, ვინც გამოიყენა ძალა 20 ივნისს. ესაა ნიკა მელიას პოზიციატია. ესაა ჩვენი პოზოცია.

და ასევე, რაც შეეხება ვადამდელ არჩევნებს, ჩვენ არ ვხედავთ, რომ ის რაც შემოთავაზებულია, არის სწორი გზა იმისათვის, რომ მივიდეთ ვადამდელ არჩევნებამდე, რადგან თვისობრივად გასხვავებული არჩევნებია ადგილობრივი და ფედერალური არჩევნები. ადამიანმა ადგილობრივ არჩევნებში შეიძლება ხმა მისცეს სხვა პარტიას, ფედერალიურში სხვას", — ამბობს მინაშვილი.

შარლ მიშელის ახალ დოკუმენტში მელიასა და რურუას გათავისუფლებისთვის შეთავაზება ამნისტია ან სხვა ნაბიჯია, რომელსაც იგივე შედეგი ექნება. ამნისტია დოკუმენტის ხელმოწერიდან ერთ კვირაში უნდა იყოს მიღებული.

"ხელისმოწერიდან 1 კვირაში პარლამენტში წარმოდგენილი ძალა მიიღებს ამნისტიის კანონს, რომელიც შეეხება 2019 წლის 19-21 ივნისის აქციების დროს წარმოშობილ ბრალდებებსა და დარღვევებს. გარდა ამისა, პარლამენტი მიიღებს შესაბამის ზომებს, რათა საპარლამენტო იმუნიტეტის მოსახსნელად მხოლოდ უმრავლესობის ხმა საკმარისი არ იყოს", — აღნიშნულია დოკუმენტში.

ქართულ ოცნებასა და ოპოზიციას ევროკავშირის წარმომადგენლობაში გამართულ შეხვედრაზე ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა. მხარეებს მოსაფიქრებლად დრო მიეცათ.

დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სვხა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც გაზიარებულია ვადამდელ არჩევნებთან დაკავშირებით ქართული ოცნების წინადადებაა, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: