ევროკავშირმა საქართველოს სასაზღვრო პოლიციას 693 000 ევროს (2 700 000 ლარის) ღირებულების ავტომანქანები გადასცა. ევროკავშირის წარმომადგენლობაში აცხადებენ, რომ ავტომანქანები უფრო დიდი 40 ერთეულიანი პაკეტის ნაწილს წარმოადგენენ, რომლის დანარჩენი 10-ის გადაცემა 2020 წლის ნოემბერში უკვე განხორციელდა.

IOM-ის საქართველოს მისიის ხელმძღვანელის სანია ჩელებიჩ ლუკოვაცის თქმით, დღევანდელი ღონისძიება არის იმ მნიშვნელოვანი შესყიდვების პროცესის გაგრძელება, რომელსაც IOM ევროკავშირის მხარდაჭერით, საქართველოს საზღვრის მართვის შესაძლებლობების გაძლიერების მიზნით ბოლო 10 წლის განმავლობაში ახორციელებს.

"ევროკავშირი და საქართველო მჭიდროდ თანამშრომლობენ საზღვრის უსაფრთხოების გაძლიერების მიმართულებით. ევროკავშირის მიერ დღეს გადაცემული ავტომანქანები საშუალებას მისცემს საქართველოს ხელისუფლებას უკანონო მიგრაციასა და დანაშაულს კიდევ უფრო ეფექტიანად გაუმკლავდეს. აღნიშნული წარმოადგენს ევროკავშირის ფართო მხარდაჭერის ნაწილს, რომელიც მიზნად ისახავს საქართველოში საზღვრების თანამედროვე სტანდარტებით მართვისა და საქართველოს მოქალაქეების უსაფრთხოების უზრუნველყოფას", — განაცხადა ევროკავშირის ელჩმა საქართველოში, კარლ ჰარცელმა.

ევროკავშირის წარმომადგენლობის ცნობით, აღნიშნული პროექტი, რომლის ბიუჯეტია 6 მილიონი ევრო (24 მილიონი ლარი), უფრო ფართო — ევროკავშირის უსაფრთხოების, ანაგრიშვალდებულებისა და საქართველოში დანაშაულის წინააღმდეგ ბრძოლის (SAFE) პროგრამის ნაწილს წარმოადგენს.

სატრანსპორტო საშუალებების გადაცემის ღონისძიება სასაზღვრო პოლიციის სახმელეთო საზღვრის დაცვის დეპარტამენტის წითელი ხიდის სამმართველოს ბაზაზე გაიმართა, სადაც შინაგან საქმეთა მინისტრის მოადგილემ, გიორგი ბუთხუზმა და სასაზღვრო პოლიციის უფროსმა, ნიკოლოზ შარაძემ ევროკავშირის წარმომადგენლობის ხელმძღვანელს საქართველოში, კარლ ჰარცელსა და მიგრაციის საერთაშორისო ორგანიზაციის (IOM) საქართველოს მისიის ხელმძღვანელ სანია ჩელებიჩ ლუკოვაცს უმასპინძლეს.