მსახიობი ნინუცა მაყაშვილი აცხადებს, რომ მას ძალადობის შესახებ საუბრამდე დიდი რეაბილიტაცია დასჭირდა. ამის შესახებ მან რუსთავი 2-ის ეთერში ისაუბრა.

"ძალიან დიდი დრო დამჭირდა იმისთვის, რომ ეს ყველაფერი გადამელახა. ყველა ის ადამიანი, ყველა ის ქალბატონი, ძალიან ბევრი ქალბატონი, ვინც ახლა უკვე აღარ არის ძალადობის მსხვერპლი, თუმცა გამოვლილი აქვს ეს ყველაფერი, დღემდე ვერ ახერხებს ლაპარაკს, მიუხედავად იმისა, რომ შეიძლება 20-30-35 წელი იყოს გასული. ამ თემაზე ლაპარაკი არის ძალიან რთული. ეს თემა მთელი ცხოვრება გაქვს გულში და გჭამს [...] იმ დღემდე, სანამ მე ამ ყველაფერს ვიტყოდი, იმ დღემდე ხდებოდა ჩემი რეაბილიტაცია", — განაცხადა მან.

მისი თქმით, ძალადობაზე ხმამაღლა საუბრით მას მხოლოდ სხვა ქალებისთვის იმის ჩვენება უნდოდა, რომ ნორმა არის ბედნიერი და წარმატებული ყოფა და არა ძალადობა.

"შურისძიება რომ მდომოდა, მე რომ 11 წელი ეს ბოროტება მეტარებინა, რა თქმა უნდა, თავის დროზე მოვახერხებდი ამის გასაჩივრებასაც და ა.შ. ჩემი მიზანი არ იყო ეს. ჩემი მიზანი იყო იყო ის, რომ იმ ქალების გულამდე, ვინც ახლა თვლის და ფიქრობს, რომ მათთვის ის ცხოვრება არის ნორმა, რაშიც არიან ახლა, მე მინდოდა მათთვის მეჩვენებინა, რომ ეს არ არის ნორმა. არის ნორმა ის, რომ შენ იქნები ბედნიერი, შენ იქნები წარმატებული, შენ იქნები კარგად თუ უბრალოდ მაინც გაძლიერდები", — განაცხადა მან.

მისივე განცხადებით, მისი მიზანი არაა მის მიერ ძალადობაში ბრალდებული მსახიობის, ბესო ზანგურის გასამართლება.

"ჩემი მიზანი რომ ყოფილიყო, სიტყვაზე, მორალური ანაზღაურება, ან რაღაც ალიმენტის დაკისრება, ან სასამართლოში ამბები რაც ხდება, ზოგადად, მე ამას გავაკეთებდი 11 წლის წინ. უბრალოდ მე ამ ადამიანისგან არაფერი არ მინდა. საერთოდ არ მინდა. მინდა, რომ ის თავის გზაზე იყოს და მე ჩემს გზაზე ვიქნები. [...] მას ჰყავს ახლა მეუღლე, მას ჰყავს 3 მცირეწლოვანი შვილი და მე არანაირი სურვილი არ მაქვს, ვიყო ის ადამიანი, ვინც ეს გამოიწვია და მას ამის გამო გაასამართლებენ", — აცხადებს მაყაშვილი.

მსახიობი და ტელეწამყვანი ნინუცა მაყაშვილი ყოფილ ქმარს, რუსთაველის თეატრის მსახიობს, ბესო ზანგურს ოჯახში ძალადობაში ადანაშაულებს. მაყაშვილმა განაცხადა, რომ ყოფილი ქმარი მასზე ფიზიკურად ძალადობდა ორსულობის დროსაც.

"არ მახსოვს რა იყო მიზეზი, მაგრამ მახსოვს, რომ ეს ყველაფრი გააკეთა თავისი ოჯახის წევრების წინ და მე ვიყავი ორსულად. ხელის აღებაც არ იყო. ანუ, რეალურად, ძალიან [მცემა]", — განაცხადა მან.

ბესო ზანგური ყოფილ ცოლზე ძალადობას უარყოფს და აცახდებს, რომ მზად არის გამოძიებას კითხვებზე პასუხები გასცეს.

"დაიწყონ გამოძიება, მოხარული ვიქნები რომ გამოძიებას გავცე პასუხები. [...] მანამდეც მყოლია ცოლი, ნინუცა მაყაშვილამდე და მის მერეც, ახლაც მყავს. არცერთი ასეთ რაღაცას არც იგონებს, არც ადასტურებს", — აცხადებს ის რუსთავი 2-თან.

• ბესო ზანგურის მტკიცებით, ძალადობა მისთვის წითელი ხაზია, რომელსაც არასდროს გადაკვეთს
• ზანგურის აზრით, მაყაშვილისადმი სოლიდარობა და მისი კრიტიკა სტურუასა და თეატრზე თავდასხმაა

მაყაშვილის განცხადებას რუსთაველის თეატრი გამოეხმაურა. მათი თქმით, გმობენ ყოველგვარ ძალადობას. კითხვაზე, აპირებენ თუ არა ბესო ზანგურთან თანამშრომლობის გაგრძელებას, თეატრში პასუხობენ, რომ ძალადობის დამტკიცებისა და იურიდიული დოკუმენტის გარეშე ამის განხილვის უფლება არ აქვთ.

"ამ ეტაპზე ჩვენ ვემიჯნებით და ვგმობთ ყველანაირ ძალადობას, მაგრამ ჩვენ არა ვართ იურიდიული დაწესებულება, რომ ეს გამოვიძიოთ. [...] თეატრს არ აქვს უფლება, იურიდიული დოკუმენტის გარეშე განიხილოს რამე", — განაცხადეს პრესსამსახურში.

საჯარო განცხადების შემდეგ, ნინუცა მაყაშვილი შსს-ში გამოკითხვაზე დაიბარეს.

ამავე თემაზე:

• პროტესტის ნიშნად, აღარ ვაპირებ ბესო ზანგურთან ერთად სცენაზე დგომას — თამთა ინაშვილი
• "რეპრესიები!" — რობერტ სტურუა ბესო ზანგურზე ნინუცა მაყაშვილის განცხადებას ეხმაურება
• "რუსთაველის თეატრში ხელს აფარებენ მოძალადეებს" — დათა თავაძე ნინუცა მაყაშვილს სოლიდარობას უცხადებს
• ჩვენ ყველამ რაღაც დავაშავეთ, საზოგადოების პრობლემაა, რომ ნინუცა ამაზე არ ლაპარაკობდა — ნინო კასრაძე
• ბესო ზანგური არის, იყო და იქნება მუდამ მოძალადე — რუსკა მაყაშვილი
• ძალადობის ყველაზე დიდი მანქანა მუშაობს თეატრის შიგნით, ჩემი მხარდაჭერა ნინუცა მაყაშვილს — ანა სანაია
• როგორც რუსთაველის თეატრის მსახიობი, სოლიდარობას ვუცხადებ ქალებს და ვგმობ ძალადობას და მოძალადეებს — ჟორდანია