დეპუტატ გიორგი ხოჯევანიშვილის თქმით, მოლოდინი აქვს, რომ ე.წ. "გახარიას გუნდს" სხვა დეპუტატებიც შეუერთდნენ.

"სიმართლე გითხრათ, მოლოდინი არსებობს [რომ სხვებიც შეუერთდებიან "გახარიას ექვსეულს"] არსებობს პირადი საუბრები სხვადასხვა გუნდის წევრებისგან, არსებობს პირადი ურთიერთობები, რომელბიც, რა თქმა უნდა, შენარჩუნებულია დღესაც და სწორედ იმ ადამიანების მხრიდან, ხშირ შემთხვევაში, გამოიხატება მზაობა იმაზე, რომ ხვალ და ზეგ იფიქრონ ჩვენი ქვეყნის უკეთეს მომავალზე და ამ შემთხვევაში, ეს იყოს ჩვენ გუნდთან ერთად", — განაცხადა ხოჯევანიშვილმა TV პირველის ეთერში.

აღსანიშნავია, რომ ქართული ოცნების წევრები კრიტიკულად განწყობილ მედიასაშუალებებთან არ თანამშრომლობენ. მაგალითად, არ მიდიან სტუმრად გადაცემებში. გიორგი ხოჯევანიშვილმა კი პარტიის დატოვებიდან რამდენიმე საათში, სატელევიზიო ინტერვიუ სწორედ TV პირველს მისცა. წამყვანის კითხვას, რა აკრძალვები არსებობს მმართველ პარტიაში ამ კუთხით, ხოჯევანიშვილმა თავი აარიდა და უპასუხა, რომ პირადად მას, არასდროს მიუღია მიწვევა TV პირველისგან.

ხოჯევანიშვილი ერთ-ერთია იმ 6 დეპუტატს შორის, რომლებმაც დღეს ქართული ოცნება დატოვეს და ყოფილი პრემიერმინისტრს, გიორგი გახარიას "პარტიის მშენებლობის ახალ ეტაპზე" უერთდებიან.

გიორგი გახარიამ პრემიერმინისტროის თანამდებობა 18 თებერვალს დატოვა და ამის მიზეზად ნაციონალური მოძრაობის თავმჯდომარის, ნიკა მელიას საქმეზე ქართული ოცნების გუნდში აზრთა სხვადასხვაობა დაასახელა.

გადადგომის შემდეგ მან პირველი საჯარო კომენტარი ჟურნალისტებთან 22 მარტს გააკეთა და თქვა, რომ არსად წასვლას არ აპირებს და პოლიტიკაში რჩება. რამდენიმე საათში იმავე შინაარსის წარწერით მან ოფიციალურ ფეისბუქგვერდზე ფოტო გამოაქვეყნა. იმავე საღამოს კი მან ტვიტერზე დაპოსტა, რომ პოლიტიკური დღის წესრიგის შექმნაზე მუშაობს.

გაიგეთ მეტი: