ქართული ოცნებიდან წასულმა დეპუტატმა, ბექა ლილუაშვილმა პარლამენტის თავმჯდომარისა და ყოფილი თანაგუნდელის, არჩილ თალაკვაძის გამოხმაურებას "ბულინგი" უწოდა და აღნიშნა — "არავინ უნდა ბულინგდებოდეს იმისთვის, რომ პოლიტიკური პარტია დატოვოს, როდესაც პოლიტიკური პარტია, როგორც ხალხის ნების აღსრულების პლატფორმა, არაეფექტიანია".

მისი განცხადებით, თალაკვაძის შეფასება მათ მიერ პარტიის დატოვებაზე, არის იმის წინაპირობა, რომ ქვეყანაში პოლიტიკური კლასის განვითარების შესაძლებლობა სუსტია.

"როგორც ჩანს, ბატონ არჩილს, როდესაც განცხადებას აკეთებდა, ჯერ კიდევ კარგად არ ჰქონდა მოსმენილი ის პოლიტიკური განცხადებები, რაც ჩვენ გავაკეთეთ. ეს გამოიხატება იმაში, რომ პირველი, რაც ჩვენ ვთქვით ქართული ოცნებიდან წასვლის მიზეზი, ეს არის სწორედ პასუხიმგებლობა, მათ შორის, ქართული ოცნებისა და საქართველოს თითოეული მოქალაქის წინაშე. ჩვენ სწორედ იმიტომ, რომ ვგრძნობთ პასუხისმგებლობას, დავტოვეთ ეს პარტია. რატომ? იმიტომ, რომ არსებული რადიკალიზაციის პირობებში პარტია, როგორც ხალხის ნების და დღის წესრიგის ეფექტიანობაზე ორიენტირებული ძალის რესურსი, არის ამოწურული", — თქვა მან.

ლილუაშვილმა განაცხადა ისიც, რომ პარტიაში შეცდომებიც იყო. მისი თქმით, "ოცნებიდან" წასული დეპუტატები ამას იაზრებენ და სწორედ ამაზე იქნება ყოფილი პრემიერმინისტრის, გიორგი გახარიას ახალი გუნდის დღის წესრიგი აწყობილი.

"შეცდომები იყო. მაგალითად ის, რომ დღეს ჩვენ გვაქვს საკმაოდ სუსტი სახელმწიფო ინტერესები, დღეს კიდევ ვსაუბრობთ კორუფციაზე, ნეპოტიზმზე, ეს ყველაფერი არის ის, რაზეც, მათ შორის, ჩვენ, როდესაც ვიყავით პარტიის წვერები, ვიზიარებთ ამ პასუხიმგებლობას და ვუსწორებთ ამ პრობლემებს თვალს. სწორედ ამაზე უნდა იყოს ჩვენი, ახალი პოლიტიკური პარტიის და გახარიას გუნდის წარმომადგენლების დღის წესრიგი აწყობილი", — თქვა მან.

ქართული ოცნების ექვსმა დეპუტატმა პარტია დატოვა და ყოფილ პრემიერმინისტრს, გიორგი გახარიას "პარტიის მშენებლობის ახალ ეტაპზე" უერთდებიან. დღეს, 14 აპრილს პარლამენტის თავმჯდომარემ, არჩილ თალაკვაძემ განაცხადა, რომ "სირცხვილია", როცა საერთო პასუხისმგებლობას ტოვებ და საუბრობ იმ პრობლემებზე, რომელთა მოსაგვარებლად მუშაობა შენი პასუხისმგებლობაცაა.