ქართული ოცნების დეპუტატის, ანრი ოხანაშვილის აზრით, რაიმე ტიპის საფრთხე, რომ ქართულ ოცნებას ქვეყნის მართვის სადავეები არ ჰქონდეს, არ არსებობს. ამის შესახებ მან პარლამენტში, ჟურნალისტებს განუცხადა.

"რა თქმა უნდა, ქართული ოცნების გუნდს ექნება სრული უმრავლესობა, ყველა იმ მნიშვნელოვანი გადაწყვეტილების მიღებისთვის, რომელიც სჭირდება ჩვენს ქვეყანას და საზოგადოებას. აქიდან გამომდინარე, რაიმე ტიპის საფრთხე, რომ ქართულ ოცნებას არ ჰქონდეს უმრავლესობა და ქვეყნის მართვის სადავეები, რათა მიღებულ იქნას ისეთი გადაწყვეტილებები, რაც სჭირდება ჩვენს საზოგადოებას და სახელმწიფოს, ასეთი რისკები გამორიცხულია და არ არსებობს", — თქვა მან.

ქართული ოცნების ექვსმა დეპუტატმა პარტია დატოვა და ყოფილ პრემიერმინისტრს, გიორგი გახარიას "პარტიის მშენებლობის ახალ ეტაპზე" უერთდებიან. ესენი არიან:

  1. გიორგი ხოჯევანიშვილი;
  2. მიხეილ დაუშვილი;
  3. ანა ბუჩუკური
  4. ალექსანდრე მოწერელია;
  5. ბექა ლილუაშვილი;
  6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.