ქართული ოცნების დეპუტატი, მიხეილ ყაველაშვილი ამბობს, რომ მმართველი პარტიიდან წასვლა დეპუტატების არჩევანი იყო, რასაც პატივს სცემს. ამის შესახებ მან პარლამენტში ჟურნალისტებთან ისაუბრა.

"მე მგონი, საზოგადოებისთვის ყველასთვის ნათელია, რომ ღია პროცესია. ღია პროცესი იყო გიორგი გახარიას წასვლაც. სინანული გამოვთქვით, რომ ასეთი ფორმით გადადგომა, როცა პრემიერმინისტრი პასუხისმგებელი პირი არის. თუმცა ჩვენ ყველა ადამიანის არჩევანს პატივს ვცემთ, ანალოგიური შემიძლია ჩვენს კოლეგა დეპუტატებზე ვისაუბრო. მათი არჩევანი, მათი არჩევანის თავისუფლება, ეს მათი გადაწყვეტილებაა, საზოგადოებამ უნდა შეაფასოს. ჩვენ გუნდში გვქონდა მსჯელობა, გვქნება მსჯელობა ამ საკითხზე, თუმცა ის ადამიანები, ვინც მის გუნდს წარმოადგენდა, არ იყო ძნელი გამოსაცნობი, რომ ერთ დღეს შეიძლება დამდგარიყო გუნდი", — თქვა მან.

ქართული ოცნების ექვსმა დეპუტატმა პარტია დატოვა და ყოფილი პრემიერმინისტრის, გიორგი გახარიას "პარტიის მშენებლობის ახალ ეტაპზე" უერთდებიან. ესენი არიან:

  1. გიორგი ხოჯევანიშვილი;
  2. მიხეილ დაუშვილი;
  3. ანა ბუჩუკური
  4. ალექსანდრე მოწერელია;
  5. ბექა ლილუაშვილი;
  6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.