ქართული ოცნების თავმჯდომარის, ირაკლი კობახიძის განცხადებით, IRI-ს კვლევის თანახმად, ქართველ პოლიტიკოსებს შორის პირველ ადგილზე გიორგი გახარიას ყოფნა იმის დამსახურებაცაა, რომ საველე სამუშაოების დროს გახარია ჯერ კიდევ პრემიერმინისტრი იყო.

"აქ ისიც არის გასათვალისწინებელი, რომ როდესაც კვლევა, საველე სამუშაოები ტარდებოდა, იმ დროს 90%-ის განმავლობაში, გიორგი გახარია ქართული ოცნების ერთ-ერთი ლიდერი და პრემიერმინისტრი იყო. ბუნებრივია, ასეთ დროს პარტიის რეიტინგი ეხმარება პერსონალურ რეიტინგს. ჩვენ მუდმივად ვსაუბრობდით იმაზე, რომ გიორგი გახარიას, როგორც პრემიერმინისტრს მაღალი რეიტინგი ჰქონდა, რაც კიდევ ერთხელ დაადასტურა IRI-ის კვლევამ", — განაცხადა მან პალიტრანიუსისე თერში.

წამყვანის კითხვაზე, ფიქრობს თუ არა ის, რომ გახარიას ინდივიდუალური რეიტინგის გაზომვისას უფრო მცირე მაჩვენებელი ექნება, კობახიძემ უპასუხა.

"ალბათ, ასე უნდა ვივარაუდოთ, გამომდინარე იქიდან, რომ პარტიის რეიტინგი პერსონალურ რეიტინგს განსაზღვრავს. თუმცა დაველოდოთ მომდევნო კვლევებს, ის აჩვენებს ყველაფერს. დღეს არც არის ეს საკითხი აქტუალური, რადგან გიორგი გახარია პოლიტიკურ პროცესებში დღეს არავითარი ფორმით არ არის ჩართული", — თქვა ქართული ოცნების თავმჯდომარემ.

მისივე თქმით, გახარიას მხრიდან პოლიტიკური პარტიის შექმნაში ისინი არავითარ პრობლემებს არ ელოდებიან.