ჯანდაცვის მინისტრის მოადგილე, თამარ გაბუნია განმარტავს, რატომ არ აიცრა პრემიერმინისტრი. მისი თქმით, ირაკლი ღარიბაშვილი არცერთ იმ რისკჯგუფში არ შედის, ვისთვისაც განსაზღვრულია ვაქცინა.

"როგორც მოგეხსენებათ, ჩვენი აცრების გეგმა მიჰყვება ძალიან მკაცრად განსაზღვრულ ეტაპობრიობას და ასაკობრივი ჯგუფების, ასევე, ჯანდაცვის სფეროს პროფესიონალების აცრა არის პრიორიტეტული. ამ შემთხვევაში, პრემიერმინისტრი არ მიეკუთვნებოდა არცერთ ჯგუფს, რომლისთვისაც განსაზღვრული არის გეგმის მიხედვით პრიორიტეტული ვაქცინაცია და მხოლოდ საზოგადოებრივი პრომოციის მიზნებისთვის ვაქცინაციის ჩატარება მიზანშეწონილად არ ჩავთვალეთ", — განაცხადა გაბუნიამ.

კითხვაზე, რატომ არ აიცრა პრემიერმინისტრი საზოგადოების მოტივაციისთვის, გაბუნიამ უპასუხა, რომ ამ მიზნით "100 ცნობადი სახის" აცრის იდეამ საზოგადოებაში არაერთგვაროვანი რეაქცია გამოიწვია.

"იყო თავიდან განსაზღვრული მსგავსი ინიციატივები, მაგრამ, შემდეგ არაერთგვაროვანი რეაქცია გამოიწვია 100 ცნობადი სახის აცრამ და რა თქმა უნდა, არც ამ შემთხვევაში არ მოხდა მისი ვაქცინაცია. სამწუხაროდ, ქვეყანა ჯერ მაინც ადრეულ ეტაპზეა ვაქცინაციის და მხოლოდ განსაკუთრებით მაღალი რისკის ჯგუფები იცრებიან, მაგრამ, როგორც ვხედავთ რისკი ყველგან არის და სამწუხაროდ, ინფექცია ყველას შეიძლება შეეხოს" — განაცხადა თამარ გაბუნიამ.

დღეს, 6 აპრილს, პრემიერმინისტრ ირაკლი ღარიბაშვილს კორონავირუსი დაუდასტურდა. როგორც ცნობია იგი თვითიზოლაციაშია და დისტანციურად აგრძელებს მუშაობას.