საერთაშორისო გამჭვირვალობა — საქართველოს ინფორმაციით, პოლიტიკურმა პარტიებმა 2020 წელს ყველაზე მეტი რეკლამა მთავარ არხსა და იმედის ჰოლდინგს დაუკვეთეს. მათი ინფრომაციით, ამ ორ ტელევიზიაში სატელევიზიო რეკლამაში ჯამურად დახარჯული თანხის 58%-ია. ამაზე საუბარია TI-ის ახალ კვლევაში, სადაც 2016-2020 წლებში გამართული 4 არჩევნების ფარგლებში პოლიტიკური სუბიექტების მიერ წინასაარჩევნო პერიოდში პოლიტიკური რეკლამის განთავსებასთან დაკავშირებული მონაცემებია წარმოდგენილი.

TI-ის განცხადებით, 2016-2020 წლებში ჩატარებულ არჩევნებს შორის პოლიტიკურ რეკლამაში ყველაზე მეტი თანხა 2020 წლის საპარლამენტო არჩევნების დროს დაიხარჯა და ჯამში 14,5 მილიონი ლარი შეადგინა. მათი ინფრომაციით, შემოსავლების მიხედვით 4,5 მლნ ლარით ტელეკომპანია მთავარი არხი ლიდერობს, მას მცირედით ჩამოუვარდება იმედის ჰოლდინგი.

"2020 წლის მონაცემებში აისახა ის ახალი რეალობა, რომელიც მედია სივრცეში გვაქვს. წინა წლებში სარეკლამო ბაზარზე შემოსავლის მხრივ ტელეკომპანია იმედი და რუსთავი 2 ლიდერობდნენ. რუსთავი 2-ის მფლობელობის ცვლილების შემდეგ ბაზარზე ახალი მაუწყებლები გამოჩნდნენ: ფორმულა და მთავარი არხი. ეს უკანასკნელი სერიოზულ კონკურენციას უწევს სხვა მაუწყებლებს და ბაზარზე ერთ-ერთ მსხვილ მოთამაშედ ჩამოყალიბდა", — ნათქვამია ორგანიზაციის განცხადებაში.

TI-იმ 2020 წლის მონაცემების შესწავლის შედეგად დაადგინა, რომ მმართველმა პარტიამ, ფასიანი პოლიტიკური რეკლამა მთავარ არხზე საერთოდ არ განათავსა და რეკლამის უმეტესობა (54%) იმედის ჰოლდინგში მიიტანა. რაც შეეხება ნაციონალურმა მოძრაობას, ანგარიშის თანახმად, რეკლამის ძირითადი ნაწილი (88%) მთავარ არხზე განათავსა და ფასიანი რეკლამა ტელეკომპანია იმედზე საერთოდ არ მიიტანა.

ახალი კვლევის მიხედვით:

• ქართული ოცნება ერთადერთი პარტიაა, რომელმაც 259 ათასი ლარის ღირებულების პოლიტიკური რეკლამა POSTV-ზე განათავსა;
• TV პირველზე ყველაზე მეტი პოლიტიკური რეკლამა პარტიამ ლელომ მიიტანა, ხოლო რუსთავი 2-ზე — ქართულმა ოცნებამ;

ამასთან, TI-ის ცნობით, 2018 წლის საპრეზიდენტო არჩევნების დროს სატელევიზიო რეკლამაში, ჯამში, 8 მილიონ ლარამდე დაიხარჯა. ყველაზე მეტი — 4,7 მილიონი ლარი, სალომე ზურაბიშვილმა, ხოლო გრიგოლ ვაშაძემ 1,7 მილიონი ლარი დახარჯა. ორგანიზაციის განცხადებითვე, ყველაზე მეტი ღირებულების პოლიტიკური რეკლამა იმ დროს რუსთავი 2-ზე განთავსდა, რასაც იმედი და TV პირველი მოსდევდა.

რაც შეეხება 2017 წლის ადგილობრივი თვითმმართველობის არჩევნებს, პოლიტიკურმა სუბიექტებმა სატელევიზიო პოლიტიკური რეკლამისთვის 6 მილიონამდე ლარი გაიღეს, საიდანაც ყველაზე მეტი შემოსავალი იმედის ჰოლდინგმა მიიღო, ხოლო 2016 წელს რეკლამის ხარჯებმა 9 მილიონ ლარზე მეტი შეადგინა და ყველაზე მეტი — 3,6 მლნ ლარის ღირებულების რეკლამა კვლავ იმედზე განთავსდა.

TI-ის ინფორმაციით, პოლიტიკური სუბიექტების მიერ აუდიტის სამსახურში წარდგენილი დოკუმენტების მიხედვით ზუსტი იდენტიფიცირება არ ხდება, თუ რომელ არხზე განათავსეს პარტიებმა პოლიტიკური რეკლამა. თუმცა, მათი ინფორმაციით, არსებული მონაცემებით დგინდება, რომ 2016 წლის საპარლამენტო არჩევნების დროს, პატრიოტთა ალიანსმა 32 ათასი ლარის, ხოლო პაატა ბურჭულაძის მოძრაობა სახელმწიფო ხალხისთვის 1,6 მილიონი ლარის ღირებულების რეკლამა დაუკვეთეს სარეკლამო გაყიდვების სახლ ინტერ მედიას.

ორგანიზაციის განცხადებით, პოლიტიკური რეკლამის განთავსება 2016 წელსაც პოლარიზებული იყო და მაგალითად, ქართულ ოცნებას რუსთავი 2-ზე, ხოლო ნაციონალურ მოძრაობას იმედზე ფასიანი პოლიტიკური რეკლამა საერთოდ არ განუთავსებია.