ყველას გვინახავს რესტორანში ან კაფეში ბავშვი, რომელიც არ ისვენებს, ხმაურობს, დარბის და ამით პრობლემებს უქმნის მშობლებსაც, რესტორანსაც და სხვა ადამიანებსაც, რომლებსაც უბრალოდ მშვიდად ჭამა უნდათ.

ამ აქტუალურმა პრობლემამ იტალიელი რესტორნის მესაკუთრე გენიალურ იდეამდე მიიყვანა, მან გადაწყვიტა, ზრდილობიანი ბავშვები და მათი მშობლები 5%-იანი ფასდაკლებით წაეხალისებინა.

ანტონიო ფერარიმ, რომელიც ქალაქ პადუაში ღვინის ბარის მესაკუთრეა, აღნიშნული შეთავაზება პირველად 11-წევრიან ოჯახს წარუდგინა. სანამ უფროსები ღვინოს მიირთმევდნენ და საუბრობდნენ, 5 მცირეწლოვანი ბავშვი ხატვითა და გაფერადებით ირთობდა თავს.

"ასეთი რამ იმდენად იშვიათად ხდება რესტორნებში, რომ გადავწყვიტე, მათთვის ფასდაკლება გამეკეთებინა" - აღნიშნა რესტორნის მესაკუთრემ ფეისბუქზე გამოქვეყნებულ პოსტში.

ოჯახს იმდენად გაუხარდა აღიარებაცა და ფასდაკლებაც, რომ საკმაოდ დიდი თანხა დატოვა "ჩაისთვის".