ქართული ოცნების თავმჯდომარის, ირაკლი კობახიძის განცხადებით, იყო საკითხები, რაზე კონსულტაციის გავლაც გუნდთან ერთად მოუწიათ, ამიტომ შეიკრიბა დღეს ქართული ოცნების პოლიტსაბჭო დისტანციურ რეჟიმში.

"იყო გარკვეული საკითხები, რაზეც გვთხოვეს ჩვენ პოზიციის დაზუსტება გუნდთან კონსულტაციების საფუძველზე. ამის შესაბამისად, ჩვენ გვქონდა კონსულტაციები, კიდევ ერთხელ შევხვდით იმისთვის, რომ რაღაცები დაგვეზუსტებინა და შეგვეჯერებინა. ანალოგიურად, კიდევ ერთი შეკრება დგვჭირდება გუნდში და ჩვენს პარტნიორებთან, რომ საბოლოოდ გამოვკვეთოთ ჩვენი გუნდის პოზიციები თემებთან დაკავშირებით", — თქვა მან.

კობახიძის განცხადებით, დღეს კიდევ ერთხელ შეიკრიბებიან და უკვე ხვალ გარკვეულ საკითხებზე ჩამოყალიბებული, კონკრეტული პოზიცია ექნებათ.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს შეხვდა. მიშელის წარმომადგენელი პოლიტიკურ პარტიებს დღეს, 29 მარტს ხვდება.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.