გირჩის ერთ-ერთი ლიდერის, იაგო ხვიჩიას განცხადებით, მოლაპარაკების პროცესში შედეგის მისაღწევად, დათმობისთვის მზად ორივე მხარე უნდა იყოს.

"ჩემი აზრით, ამ მოლაპარაკებაზე არ უნდა ვიყოთ სასწაულის იმედად, ისე, როგორც წინა მოლაპარაკებაზე. ქართულ პოლიტიკურ სპექტრს უნდა გვინდოდეს შეთანხმება, თუ არ გვინდა, ამას ჩვენ გარეშე ვერავინ მიაღწევს.

თუ გვინდა, რომ პერსპექტივა ჰქონდეს მოლაპარაკებას, ყველა მხარე უნდა იყოს მზად რაღაცა ტიპის დათმობისთვის — ხელისუფლება იმაზე, რომ, სიტყვაზე, პოლიტპატიმრების საკითხში დათმობები გააკეთოს, ხოლო ოპოზიცია იმისთვის, რომ ვადამდელი არჩევნების საკითხში გააკეთოს რაღაც დათმობები. ეს არ იქნება საბოლოო შედეგის მიღწევის წინაპირობა, მაგრამ ნაბიჯს გადაგვადგმევინებს და მოლაპარაკებისთვის სივრცეებს გააჩენს", — განაცხადა ხვიჩიამ რუსთავი 2-თან.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის პოლიტიკურ პარტიებთან შეხვედრებს ორშაბათიდან, 29 მარტიდან დაიწყებს.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.