ქართული ოცნების დეპუტატი, გურამ მაჭარაშვილი იმედოვნებს, რომ ოპოზიცია მმართველი პარტიის მიერ შეთავაზებულ შეთანხმებას ხელს მოაწერს.

"მაინც გვაქვს მოლოდინი, რომ ოპოზიცია ამ შემთხვევაში მაინც მოისურვებს ხელი მოაწეროს იმ შეთანხმებას და შეთავაზებებს, რომელიც ქართული ოცნების მხრიდან არის შეთავაზებული და რომელიც ქართული დემოკრატიის განვითარებას და ევროპული ხარისხით არჩევნების ჩატარებას ემსახურება", — განაცხადა მაჭარაშვილმა.

საპარლამენტო უმრავლესობის წევრის თქმით, ხელისუფლების მიერ დაანონსებული საკონსტიტუციო ცვლილებები ქართულ პოლიტიკურ სივრცეში პოლიტიკური პლურალიზმის მიღწევას უზრუნველყოფს.

"ეს გულისხმობს, რომ მცირე მხარდამჭერის მქონე პარტიებს ჰქონდეთ საშუალება, შევიდნენ პარლამენტში, ასევე, მინიმუმ ოთხი დეპუტატის შეკრების შემთხვევაში, ფრაქციის შექმნა შეძლონ. აგრეთვე, ჩვენ მას [კრისტიან დანიელსონს] ვხვდებით მართლმსაჯულების სისტემის საკანონმდებლო ინიცირებით, რომლის ცვლილებებიც სწორედ პოლიტიკური ოპონენტების და არაერთი საერთაშორისო ორგანიზაციების და საზოგადოების შენიშვნებს ემსახურება. აქედან გამომდინარე, ამას ემატება საარჩევნო კოდექსში შესატანი ცვლილებები, რომელიც, ასევე, ერთი ერთში პასუხობს ეუთო/ოდირის რეკომენდაციებს და ბუნებრივია, ჩვენ გვაქვს ყველა ის კომპლექტი, რათა შედგეს პოლიტიკური შეთანხმება იმ რადიკალურ ოპოზიციასთან, რომელსაც სრულიად უარგუმენტოდ აქვს უარი ამ პოლიტიკურ შეთანხმებაზე", — ამბობს მაჭარაშვილი.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის სამუშაო პროცესს ორშაბათიდან, 29 მარტიდან დაიწყებს.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.