შრომის პირობების გაუმჯობესების მოთხოვნით, სოციალურმა აგენტებმა მთავრობის მეთაურის სახელზე წერილი შეიტანეს. ისინი უპირველეს ყოვლისა, ღირსეული შრომის ანაზღაურებასა და პირობებს ითხოვენ. სოც. აგენტები, ასევე, პრემიერმინისტრ ირაკლი ღარიბაშვილთან შეხვედრასაც ითხოვენ.

"სოციალური აგენტები აგრძელებენ ბრძოლას ღირსეული შრომისთვის. მივმართავთ პრემიერმინისტრს, ჯანდაცვის მინისტრს და შრომის ინსპექციას. ჩვენ უკვე წლებია ვიბრძვით იმისთვის, რომ სოციალურმა აგენტებმა ღირსეული შრომის პირობები მოიპოვონ, თუმცა ამ დრომდე უშედეგოდ", — აცხადებს ერთ-ერთი სოც. აგენტი.

Posted by სოციალური აგენტები on Thursday, 25 March 2021

ღირსეული ანაზღაურების გარდა, მათი მოთხოვნები შემდეგია:

  • გამოიყოს გზის ხარჯი;
  • მიეცეთ მათ ბენეფიციარებთან გათანაბრებული ჯანმრთელობის პაკეტი. მათივე თქმით, სოც. აგენტებს ამჟამად დაზღვევა საერთოდ არ აქვთ;
  • მოხდეს პროფკავშირის აღიარება და ორგანული კანონი შრომის კოდექსის უზრუნველყოფილი მუხლების შესაბამისად კოლექტიური ხელშეკრულება პროფკავშირის იურისტის ჩართულობით გაფორმდეს;
  • ხელშეკრულების ვადა, ასევე, დარეგულირდეს შრომის კოდექსის მიხედვით და გახდეს უვადო მათთვის, ვისაც ეკუთვნის და ვისაც არ ეკუთვნის მინიმუმ 1-წლიანი;
  • ხელშეკრულებაში დამსაქმებლის ვალდებულებებში შევიდეს ცვლილება და გახდეს ვალდებული, როდესაც მესამე პირი დაობს, დასაქმებულს იურიდიული მომსახურება გაუწიოს;
  • სპეციალისტებისა და უფროსი სპეციალისტების ანაზღაურების ზრდა 12 წლიანი ინფლაციისა და სხვა გარემოებების გათვალისწინებით მოხდეს;
  • სანამ სააგენტოს მიზეზით გამოწვეული შემცირებული დავალებების პირობებში მუშაობენ და ხელფასი, ფაქტობრივად, 200-300 ლარი აქვთ, მინიმუმ 200 ლარიანი დანამატი გაიცეს.

ისინი ამბობენ, რომ 12 წელია სააგენტოში აგენტების ხელფასი არ შეცვლილა. მათივე თქმით, წინა წელს იყო მედიაციის პროცესი, რომელიც უშედეგოდ დასრულდა.